কংগ্ৰেছৰ শীৰ্ষ নেতা তথা প্ৰাক্তন সাংসদ ৰাহুল গান্ধীয়ে শীঘ্ৰেই ভ্ৰমণ কৰিব তেওঁৰ হেৰুওৱা সমষ্টি। চুৰাট আদালতে মানহানিৰ গোচৰত দুবছৰৰ কাৰাদণ্ড বিহাৰ পিছদিনাই সাংসদ পদৰ বাবে অযোগ্য হোৱা গান্ধীয়ে অহা ১১ এপ্ৰিলত তেওঁৰ পূৰ্বৰ সমষ্টি কেৰেলাৰ ৱায়ানাদ ভ্ৰমণ কৰাৰ সম্ভাৱনা আছে।
২০১৯ চনত ৱায়ানাদ লোকসভাৰ আসনৰ পৰা নিৰ্বাচিত হোৱা সাংসদ ৰাহুল গান্ধীক ২৩ মাৰ্চত গুজৰাটৰ চুৰাট আদালতে দোষী সাব্যস্ত কৰাৰ পিছদিনাই লোকসভা সচিবালয়ে তেওঁৰ সদস্যপদ খাৰিজ কৰিছিল। ইয়াৰ পৰিণতিত জনপ্ৰতিনিধিহীন হৈছিল ৱায়ানাদ সমষ্টি।
২৯ মাৰ্চত কৰ্ণাটক নিৰ্বাচনৰ তাৰিখ ঘোষণা কৰাৰ সময়তে ৱায়ানাদ লোকসভা সমষ্টিৰ উপ-নিৰ্বাচনৰ দিন ঘোষণা কৰা হ’ব বুলি অনুমান কৰা হৈছিল যদিও নিৰ্বাচন আয়োগে ৱায়ানাদ লোকসভা সমষ্টিৰ উপ-নিৰ্বাচন অনুষ্ঠিত কৰিবলৈ খৰখেদা কৰাৰ কোনো প্ৰয়োজন নাই বুলি মন্তব্য কৰিছিল।
মুখ্য নিৰ্বাচন আয়ুক্ত ৰাজীৱ কুমাৰে সংবাদ মাধ্যমক সম্বোধন কৰি স্পষ্ট কৰি দিছিল যে আদালতে ৰাহুল গান্ধীক আইনী প্ৰতিকাৰ বিচাৰিবলৈ ৩০ দিনৰ সময় দিছে আৰু তেতিয়ালৈকে আয়োগে অপেক্ষা কৰিব।
এতিয়া সাংসদ পদ খাৰিজৰ পিছত প্ৰথমবাৰৰ বাবে ৱায়ানাদ ভ্ৰমণ কৰিব ৰাহুল গান্ধীয়ে। শেষবাৰৰ বাবে চলিত বৰ্ষৰ ফেব্ৰুৱাৰী মাহত নিজৰ সমষ্টি ভ্ৰমণ কৰিছিল কংগ্ৰেছ নেতাগৰাকীয়ে।
ৱায়ানাদ জিলা কংগ্ৰেছ কমিটীৰ সূত্ৰ অনুসৰি, ৰাহুল গান্ধীয়ে ১১ এপ্ৰিলত ৱায়ানাদ ভ্ৰমণ কৰাৰ সম্ভাৱনা আছে। এই কথা প্ৰকাশ কৰা জিলা কংগ্ৰেছৰ বিষয়াগৰাকীয়ে অৱশ্যে নিজৰ নাম প্ৰকাশ নকৰিবলৈ অনুৰোধ জনাইছে।
