জনপ্ৰিয় কমেডিয়ান কুনাল কামৰাই মহাৰাষ্ট্ৰৰ মুখ্যমন্ত্ৰী একনাথ শিণ্ডেক লৈ কৰা মন্তব্যৰ বাবে ক্ষমা খুজিবলৈ স্পষ্টভাৱে অস্বীকাৰ কৰিছে। এই বিতৰ্কৰ সূত্ৰপাত হোৱা এবছৰ পাৰ হৈ গ‘ল যদিও তেওঁ নিজৰ স্থিতিত অটল আছে। শেহতীয়াকৈ মহাৰাষ্ট্ৰ বিধানসভাৰ বিশেষাধিকাৰ সমিতিৰ সন্মুখত হাজিৰ হৈ কুনালে দৃঢ়তাৰে জনায় যে তেওঁ নিজৰ মন্তব্যৰ বাবে অকণো অনুতপ্ত নহয় আৰু কোনো কাৰণতে ক্ষমা নোখোজে।
যোৱা বছৰৰ মাৰ্চ মাহত মুম্বাইৰ এখন হোটেলত কুনাল কামৰাই এটা ষ্টেণ্ড আপ কমেডী অনুষ্ঠান পৰিৱেশন কৰিছিল। সেই অনুষ্ঠানত তেওঁ এটা জনপ্ৰিয় হিন্দী গীতৰ পেৰ‘ডী গাই শিৱসেনা দলৰ বিভাজনটোক লৈ ব্যংগ কৰিছিল। কাৰো নাম পোনপটীয়াকৈ উল্লেখ নকৰিলেও তেওঁ একনাথ শিণ্ডেক ৰাষ্ট্ৰদ্ৰোহী বুলি কটাক্ষ কৰিছিল। এই অনুষ্ঠানৰ ভিডিঅ‘টো ছ‘চিয়েল মিডিয়াত ভাইৰেল হৈ পৰাৰ লগে লগে সমগ্ৰ মহাৰাষ্ট্ৰত তীব্ৰ প্ৰতিক্ৰিয়াৰ সৃষ্টি হৈছিল আৰু শিণ্ডেৰ সমৰ্থকসকলৰ মাজত ক্ষোভৰ জুই জ্বলি উঠিছিল।
ভিডিঅ‘টো ভাইৰেল হোৱাৰ পিছত কুনাল কামৰাই যথেষ্ট ভাবুকিৰ সন্মুখীন হ‘বলগীয়া হৈছিল। জানিব পৰা মতে, তেওঁলৈ প্ৰায় পাঁচশৰো অধিক ভাবুকি ভৰা ফোন আহিছিল। আনকি যিখন হোটেলত এই অনুষ্ঠানটো অনুষ্ঠিত হৈছিল, তাতো শিৱসেনাৰ একাংশ সমৰ্থকে আক্ৰমণ চলাইছিল বুলি অভিযোগ উঠিছিল। পৰিস্থিতি ইমানেই বেয়া হৈছিল যে মহাৰাষ্ট্ৰৰ উপ-মুখ্যমন্ত্ৰী দেৱেন্দ্ৰ ফাড়নবিছেও কুনালক লগে লগে ক্ষমা খুজিবলৈ দাবী জনাইছিল।
এই বিতৰ্কৰ বাবেই কুনালক বিশেষাধিকাৰ সমিতিৰ পৰা জাননী প্ৰেৰণ কৰা হৈছিল। প্ৰথমে তেওঁ কোনো উত্তৰ দিয়া নাছিল যদিও যোৱা মঙলবাৰে তেওঁ সমিতিৰ সন্মুখত হাজিৰ হ‘বলৈ বাধ্য হয়। এই শুনানিৰ বিষয়ে তেওঁ নিজেই ছ‘চিয়েল মিডিয়াত সবিশেষ জনাইছে। এক্স হেণ্ডেলত তেওঁ লিখিছে যে সমিতিয়ে তেওঁক সুধিছিল তেওঁৰ কোনো আক্ষেপ আছে নেকি আৰু তেওঁ ক্ষমা বিচাৰিব নেকি। সকলো প্ৰশ্নৰ উত্তৰত কুনালে স্পষ্টকৈ নাই বুলি কয়। তেওঁ লগতে কয় যে শিল্পী আৰু তেওঁলোকৰ মত প্ৰকাশৰ স্বাধীনতা সদায় গুৰুত্বপূৰ্ণ। এবছৰৰ পাছতো নিজৰ মন্তব্যৰ প্ৰতি থকা এই অনমনীয় স্থিতিয়ে এতিয়া পুনৰ সংবাদ মাধ্যমত চৰ্চা লাভ কৰিছে।
