পৰমানু নিৰস্ত্ৰীকৰণক লৈ আমেৰিকা আৰু উত্তৰ কোৰিয়াৰ মাজত উত্তেজনা বৃদ্ধি পাব পাৰে।
দুয়োখন দেশৰ মাজত চলি থকা সংঘাতৰ মাজতে উত্তৰ কোৰিয়াই আমেৰিকাৰ ৰাষ্ট্ৰপতি ডোনাল্ড ট্ৰাম্পলৈ স্পষ্ট বাৰ্তা প্ৰেৰণ কৰিছে যে তেওঁলোকৰ আমেৰিকাৰ সৈতে আলোচনা কৰাৰ কোনো প্ৰয়োজন নাই।
দেশখনে আমেৰিকাই তেওঁলোকৰ ৰাজনৈতিক উদ্দেশ্যহে বুজি পায় বুলিও সদৰী কৰে। এয়া কূটনৈতিক দিশত আমেৰিকাৰ বাবে ডাঙৰ আঘাত বুলি ক’ব পাৰি।
আমেৰিকাৰ প্ৰতিনিধিয়ে দক্ষিণ কোৰিয়া ভ্ৰমণ কৰাৰ পাছত শনিবাৰে উত্তৰ কোৰিয়াৰ এগৰাকী জ্যেষ্ঠ ৰাজনৈতিক নেতাই দেশখনৰ বক্তৱ্য প্ৰকাশ কৰে।
দেশখনৰ উপ বিদেশ মন্ত্ৰী চোই সোন হুইয়ে কয় যে ৱাশ্বিংটন আৰু পোংগয়াংগৰ মাজত কোনো আলোচনা নহয় আৰু উত্তৰ কোৰিয়াৰ নীতিৰ কোনো সলনি নহয়।
উপ বিদেশ মন্ত্ৰী গৰাকীয়ে দিয়া বিবৃতিত কয়, ‘’আমি আমেৰিকাৰ সৈতে সমুখা-সমুখিকৈ বহাৰ কোনো প্ৰয়োজন নাই কিয়নো এই আলোচনা আমেৰিকাৰ ৰাষ্ট্ৰপতি ট্ৰাম্পৰ বাবে নিজৰ দেশৰ সংকটৰ সময়ত এক ৰাজনৈতিক উদ্দেশ্যৰ বাহিৰে আন একো নহয়।‘’
ইপিনে, দক্ষিণ কোৰিয়াৰ ৰাষ্ট্ৰপতি মুন জে-ইনে যোৱা বুধবাৰে কয় যে আমেৰিকাৰ ৰাষ্ট্ৰপতি ডোনাল্ড ট্ৰাম্প আৰু উত্তৰ কোৰিয়াৰ নেতা কিম জং উন নৱেম্বৰত হ’বলগীয়া নিৰ্বাচনৰ পূৰ্বে পুনৰ আলোচনাত মিলিত হোৱা উচিত। ই বন্ধ হৈ থকা পৰমানু আলোচনা পুনৰ আৰম্ভ কৰাত সহায়ক হ’ব।
উল্লেখ্য যে কিম জং উন আৰু ডোনাল্ড ট্ৰাম্পৰ মাজত প্ৰথমবাৰ ২০১৮চনত ছিংগাপুৰত বৈঠক অনুষ্ঠিত হৈছিল। ২০১৯ত তেওঁলোকে ভিয়েটনামত মিলিত হৈছিল।
উক্ত আলোচনাসমূহ ব্যৰ্থ হোৱাৰ কাৰণ আছিল উত্তৰ কোৰিয়াই নিষেধাজ্ঞা উঠাই লোৱাৰ বিনিময়ত পৰমানু অস্ত্ৰ তথা বেলিষ্টিক মিছাইল ধ্বংস কৰিবলৈ অমান্তি হয়।
