চিকিৎসাবিজ্ঞানৰ জগতত এক বিৰল আৰু বিস্ময়কৰ সফলতাৰ খবৰ পোহৰলৈ আহিছে। এদল অভিজ্ঞ চিকিৎসকে অত্যাধুনিক ৰবটিক ছাৰ্জাৰীৰ সহায়ত এগৰাকী ২১ বছৰীয়া বিশেষভাৱে সক্ষম যুৱতীক এক জটিল শাৰীৰিক সমস্যাৰ পৰা মুক্তি দি নতুন জীৱন প্ৰদান কৰিছে। ভ্যাজাইনাল এজেনাচিচ নামৰ এক বিৰল জন্মগত ত্ৰুটিৰ চিকাৰ হৈছিল এই যুৱতীগৰাকী। এই সমস্যাৰ বাবে তেওঁৰ শৰীৰত স্বাভাৱিক যোনিপথ নাছিল। পৰিসংখ্যা অনুসৰি প্ৰতি পাঁচৰ পৰা সাত হাজাৰ কিশোৰীৰ ভিতৰত মাত্ৰ এগৰাকীৰ ক্ষেত্ৰত এনে ধৰণৰ সমস্যা দেখা পোৱা যায়। এই যুৱতীগৰাকীৰ ক্ষেত্ৰত সমস্যাটো অধিক জটিল আছিল কাৰণ তেওঁৰ শৰীৰত আন কিছুমান অংগৰ বিকৃতিও আছিল।
যোৱা দুবছৰ ধৰি যুৱতীগৰাকীয়ে অসহ্যকৰ পেটৰ বিষ আৰু পেলভিক যন্ত্ৰণাত ভুগি আছিল। প্ৰতি মাহে ঋতুস্ৰাৱৰ তেজ বাহিৰলৈ ওলাই যোৱাৰ কোনো পথ নথকা বাবে সেই তেজ জরায়ুতে জমা হৈ আছিল। ইয়াৰ ফলত যন্ত্ৰণাৰ মাত্ৰা ক্ৰমান্বয়ে বাঢ়ি গৈছিল। নিজৰ চহৰৰ কেইবাখনো আগশাৰীৰ চিকিৎসালয়লৈ যোৱাৰ পিছতো তেওঁ কোনো সঠিক সমাধান পোৱা নাছিল। বেছিভাগ চিকিৎসকেই তেওঁক জরায়ু কাটি পেলাই দিয়াৰ পৰামৰ্শ দিছিল। কিন্তু জরায়ু আঁতৰাই দিলে যুৱতীগৰাকীয়ে ভৱিষ্যতে মাতৃ হোৱাৰ সম্ভাৱনা চিৰদিনৰ বাবে হেৰুৱাই পেলালেহেঁতেন। সকলো আশা এৰি দিয়াৰ পৰত পৰিয়ালটোৱে বিশেষজ্ঞ চিকিৎসকৰ এটা দলৰ কাষ চাপে।
বিশেষজ্ঞ চিকিৎসসকলে যুৱতীগৰাকীৰ পেলভিচৰ এমআৰআই কৰি গম পায় যে কোনো পথ নথকাৰ বাবে ঋতুস্ৰাৱৰ তেজ জরায়ুৰ ভিতৰতে আবদ্ধ হৈ আছে। চিকিৎসাসকলৰ মতে এইয়া এক অত্যন্ত জটিল অস্ত্ৰোপচাৰ আছিল। সঠিক সময়ত চিকিৎসা নকৰিলে ইয়াৰ পৰা সংক্ৰমণ আৰু এণ্ডোমেট্ৰিঅ’চিচৰ দৰে ভয়াবহ ৰোগ হ’ব পাৰিলেহেঁতেন। ইয়াৰ ফলত তেওঁৰ ডিম্বাশয়ৰ ক্ষতি হোৱাৰ লগতে প্ৰজনন ক্ষমতাও নষ্ট হ’লহেঁতেন। এই প্ৰত্যাহ্বানজনক পৰিস্থিতিত চিকিৎসকে ৰবটৰ সহায়ত কৰা বিশেষ অস্ত্ৰোপচাৰৰ সিদ্ধান্ত লয়।
এই অত্যাধুনিক ৰবটিক ছাৰ্জাৰীৰ জৰিয়তে অতি নিখুঁতভাৱে আৰু কম তেজক্ষয় হোৱাকৈ অস্ত্ৰোপচাৰটো সম্পন্ন কৰা হয়। ইয়াৰ ফলত সংক্ৰমণৰ সম্ভাৱনাও বহুখিনি কমি যায়। সফলতাৰে অস্ত্ৰোপচাৰ সম্পন্ন হোৱাৰ মাত্ৰ তিনি দিনৰ পিছতে যুৱতীগৰাকী সুস্থ হৈ ঘৰলৈ উভতি যায়। বৰ্তমান তেওঁৰ ঋতুস্ৰাৱ প্ৰক্ৰিয়া স্বাভাৱিক হোৱাৰ লগতে তেওঁ ভৱিষ্যতে সন্তান জন্ম দিয়াৰ ক্ষমতাও লাভ কৰিছে। চিকিৎসাবিজ্ঞানৰ এই সফলতাই এক অসম্ভৱক সম্ভৱ কৰি তুলি যুৱতীগৰাকীৰ মুখত হাঁহি বিৰিঙাইছে।
