উদ্যোগপতি, অভিনেতা, ৰাজনীতিবিদৰ বাহিৰেও এতিয়া এপষ্টেইন ফাইলত ন’ম চমস্কিৰ নাম আছে বুলি জানিব পৰা গৈছে। শেহতীয়াকৈ আমেৰিকাৰ যৌন অপৰাধী কোটিপতি জেফ্ৰি এপষ্টেইনৰ সৈতে জড়িত সকলো ফাইল ৰাজহুৱা কৰাৰ বাবে ড’নাল্ড ট্ৰাম্পে এখন বিধেয়কত স্বাক্ষৰ কৰিছে।
প্ৰকাশিত তালিকাত থকা সকলোকে আচৰিত কৰি তোলা নামটো হ’ল ন’ম চমস্কি। বিখ্যাত শিক্ষাবিদ চমস্কিয়ে এপষ্টেইনক ‘অতি মূল্যৱান বন্ধু’ বুলি উল্লেখ কৰিছিল। লগতে তথ্যত নাম উল্লেখ কৰাসকলৰ ভিতৰত ড’নাল্ড ট্ৰাম্পৰ প্ৰাক্তন মুখ্য নিৰ্বাচনী কৌশলবিদ ষ্টিভ বেননো আছে। তেওঁ এপষ্টেইনৰ সৈতে ৰাজনৈতিক কৌশলৰ বিষয়ে কথা পাতিছিল। লগতে এই তালিকাত আছে আমেৰিকাৰ প্ৰাক্তন কোষাগাৰ সচিব তথা হাৰ্ভাৰ্ডৰ সভাপতি লেৰী ছামাৰ্ছ। আন আন নামসমূহ হ’ল ইলন মাস্ক, প্ৰিন্স এণ্ড্ৰু আৰু আমেৰিকাৰ প্ৰাক্তন ৰাষ্ট্ৰপতি বিল ক্লিণ্টন। আটাইকেইজনেই কৈছে যে তেওঁলোক কোনো এনে ঘটনাৰ লগত জড়িত নহয়। কিন্তু চৰকাৰী বিভাগে কৈছে যে এই ফাইলত তেওঁলোকৰ নাম আছে বুলিয়েই তেওঁলোক দোষী নহয়।
এপষ্টেইন ফাইলছ ট্ৰেন্সপাৰেন্সি এক্ট নামেৰে জনাজাত এই বিধেয়কখনৰ জৰিয়তে ন্যায় বিভাগে এপষ্টেইনৰ তদন্তৰ সৈতে জড়িত সকলো তথ্য ৩০ দিনৰ ভিতৰত “সন্ধানযোগ্য আৰু ডাউনলোড কৰিব পৰা ফৰ্মেটত” প্ৰকাশ কৰিব লাগিব। এই বিধেয়কখন আইনত পৰিণত হোৱাৰ পিছৰে পৰা চৰকাৰৰ বিৰোধী দলৰ বহু নেতাক এপষ্টেইনে লক্ষ্য কৰি লৈছে। আন ক্ষেত্ৰৰ বহু গুৰুত্বপূৰ্ণ ব্যক্তিক ৰেহাই দিয়া হোৱা নাই। আমেৰিকাৰ হাউছ অভাৰচাইট কমিটীয়ে প্ৰকাশ কৰা ২৩ হাজাৰৰো অধিক ইমেইল, টেক্সট আৰু নথি-পত্ৰ প্ৰকাশ কৰিছে। তথ্য অনুসৰি ২০০৮ চনত দোষী সাব্যস্ত হোৱাৰ পিছতো এপষ্টেইনৰ প্ৰভাৱ বছৰ বছৰ ধৰি অব্যাহত আছিল।
উল্লেখ্য যে ২০০৬ চনত প্ৰথমবাৰৰ বাবে এপষ্টেইন পোহৰলৈ আহে।১৪ বছৰীয়া নাবালিকাৰ পিতৃ-মাতৃয়ে অভিযোগ কৰে যে এপষ্টেইনে নিজৰ পাম বিচৰ অট্টালিকাত তেওঁলোকৰ কন্যাক যৌন নিৰ্যাতন চলাইছিল। তেওঁৰ বিৰুদ্ধে প্ৰচুৰ প্ৰমাণ পোৱাৰ পিছতো এই অতি বিতৰ্কিত গোচৰটোত এপষ্টেইনক দোষমুক্ত কৰা হয়। ফলত তেওঁ ফেডাৰেল অভিযোগৰ পৰা হাত সাৰিবলৈ সক্ষম হয়। মাত্ৰ ১৩ মাহহে কাউন্টি জেলত কটাই।এই সময়চোৱাত তেঁওক যৌন অপৰাধী হিচাপেও পঞ্জীয়ন কৰিবলৈয়ো চৰকাৰ বাধ্য হৈছিল।
