পৃথিৱীৰ বিভিন্ন প্ৰান্তত সংঘাত বা যুদ্ধ সংঘটিত হৈছে। ইৰাণত চলি আছে ‘যুদ্ধ’। ইয়াৰে কোনো এটাৰ লগত কিম জং উনৰ উত্তৰ কোৰিয়া প্ৰত্যক্ষভাৱে জড়িত নহয়। তাৰ মাজতে দক্ষিণ কোৰিয়াই দাবী কৰিছে যে উত্তৰ কোৰিয়াই জাপান সাগৰৰ ফালে প্ৰায় ১০টা বেলিষ্টিক মিছাইল নিক্ষেপ কৰিছে।
সংবাদ সংস্থাৰ এক প্ৰতিবেদন অনুসৰি দক্ষিণ কোৰিয়াৰ জইন্ট চীফ অফ ষ্টাফে জনোৱা মতে, স্থানীয় সময় অনুসৰি নিশা ১:৩০ বজাত প্ৰায় ১০টা বেলিষ্টিক মিছাইল ধৰা পৰিছে। যিবোৰ উত্তৰ কোৰিয়াৰ চুনান অঞ্চলৰ পৰা সাগৰৰ ফালে নিক্ষেপ কৰা হৈছিল।
সংবাদ সংস্থাৰ প্ৰতিবেদন অনুসৰি ছিউলে দাবী কৰিছে যে পিয়ংইয়াঙে দক্ষিণ কোৰিয়া আৰু আমেৰিকাৰ সৈতে যৌথ সামৰিক অনুশীলন চলোৱাৰ পিছত নিজৰ শক্তি প্ৰদৰ্শনৰ বাবে এই ক্ষেপণাস্ত্ৰ নিক্ষেপ কৰিছে।
টকিঅ’ই দাবী কৰিছে যে জাপানৰ একচেটিয়া অৰ্থনৈতিক অঞ্চলৰ বাহিৰত এই ক্ষেপণাস্ত্ৰ সাগৰত পৰিছে। অৱশ্যে দক্ষিণ কোৰিয়াই কোনো ধৰণৰ ৰিস্ক লোৱা নাই। বাতৰি অনুসৰি, দক্ষিণ কোৰিয়াৰ সেনাই নিৰীক্ষণ বৃদ্ধি কৰা বুলি প্ৰকাশ কৰিছে। যিকোনো পৰিস্থিতিৰ বাবে বাহিনীটোক সাজু কৰি ৰখা হৈছে।
উত্তৰ কোৰিয়াই কোনো অতিৰিক্ত অস্ত্ৰ নিক্ষেপ কৰে নে নকৰে সেই সন্দৰ্ভত আমেৰিকা আৰু জাপানৰ সৈতে বিভিন্ন তথ্য শ্বেয়াৰ কৰা হৈছে বুলি উল্লেখ কৰিছে দক্ষিণ কোৰিয়াই।
