উত্তৰ কোৰিয়াৰ একনায়কত্ববাদী শাসক কিম জং উনক প্ৰায় কুৰি দিনৰ পাছত পুনৰ ৰাজহুৱা স্থানত দেখা গৈছে।
উত্তৰ কোৰিয়াৰ ৰাষ্ট্ৰপতিগৰাকী দেশৰ চেন্ট্ৰেল মিলিটাৰী কমিছনৰ এখন বৈঠকত অংশ লোৱাৰ বাবে উপস্থিতি হোৱাৰ কথা স্থানীয় সংবাদ মাদ্যমত প্ৰকাশ পাইছে।
সামৰিক বাহিনীৰ উচ্চ পদস্থ বিষয়াসকলৰ সৈতে নিউক্লিয়াৰ ৱাৰ ডিফেন্স সন্দৰ্ভত নতুন নীতিকে ধৰি কেইটামান বিষয়ে আলোচনা কৰা বুলি জনা গৈছে।
অৱশ্যে, এই বৈঠকৰ সময় সম্পৰ্কে কোনো কথা প্ৰকাশ কৰা হোৱা নাই।
কোৰিয়ান চেন্ট্ৰেল নিউজ এজেন্সিয়ে জানিবলৈ দিয়া মতে, বৈঠকত দেশখনৰ পাৰমানৱিক যুদ্ধ প্ৰতিৰোধ শক্তি অধিক বৃদ্ধি কৰি তোলা তথা সামৰিক বাহিনীক ৰণ কৌশলগতভাৱে অধিক সক্ৰিয় কৰি তোলাৰ নতুন নীতিৰ বিষয় তুলি ধৰা হয়।
সামৰিক বিষয়াসকলৰ সৈতে হোৱা বৈঠকৰ কিছুমান ছবি প্ৰকাশ পাইছে। এই ছবিত কিমে সামৰিক বিষয়াসকলক নিৰ্দেশ দিয়া দেখা গৈছে।
কোৰিয়ান চেন্ট্ৰেল নিউজ এজেন্সিৰ প্ৰতিবেদনত প্ৰকাশ কৰা মতে, বৈঠকত কিছুমান সেনা বিষয়াৰ পদৰ সালসলনি ঘটোৱা হৈছে।
উল্লেখযোগ্য যে কিম জং উনৰ শাৰীৰিক অসুস্থতাক লৈ সমগ্ৰ বিশ্বতে সৃষ্টি হোৱা আলোড়নৰ পাছত প্ৰায় কুৰিদিন পূৰ্বে কিমে এটি সাৰ কাৰখানা উদ্বোধন কৰাৰ বাতৰিয়ে সকলো জল্পনা-কল্পনাৰ অৱসান ঘটাইছিল।
এইবাৰ আকৌ কিম জং উনৰ ৰাজহুৱা উপস্থিতিৰ বাতৰি প্ৰকাশ পোৱাৰ পাছত বিশ্বৰ সাম্প্ৰতিক পৰিস্থিতিত উত্তৰ কোৰিয়াৰ স্থিতিক লৈ সকলো সজাগ হৈ পৰিছে।
