আজি সমগ্ৰ অসমৰ লগতে তিনিচুকীয়া জিলাৰ মাৰ্ঘেৰিটাতো ‘কেব’ বিৰুদ্ধে ব্যাপক প্ৰতিবাদ সাব্যস্ত হয়। পুৱাৰে পৰা হাজাৰ হাজাৰ লোক আছুৰ আহ্বানত ৰাজপথলৈ ওলাই আহিল।
মাকুমপথাৰ, চেগুনবাৰী তিনিআলি, মাৰ্ঘেৰিটা বজাৰ, লিডু, জাগুন আদি বিভিন্ন অঞ্চলৰ ৰাষ্ট্ৰীয় ঘাইপথত টায়াৰ জ্বলাই প্ৰতিবাদকাৰীসকলে বিধেয়কৰ বিৰোধিতা কৰি প্ৰতিবাদ সাব্যস্ত কৰে।
মাৰ্ঘেৰিটা আঞ্চলিকৰ ছাত্ৰ সন্থাৰ সভাপতি চিন্তু গগৈ আৰু ভাঃ সম্পাদক ৰুপম বৰুৱাৰ নেতৃত্বত প্ৰতিবাদী ৰাইজে চেগুনবাৰী তিনিআলিৰ পৰা মাৰ্ঘেৰিটা বজাৰ পৰা পুনৰ চেগুনবাৰী তিনিআলিলৈকে প্ৰতিবাদী সমদলো বাহিৰ কৰে।
নৰেন্দ্ৰ মোদী, অমিত শ্বাহ, মুখ্য মন্ত্ৰী সৰ্বানন্দ, হিমন্তু বিশ্ব শৰ্মাৰ বিৰুদ্ধে ধাৰাবাহিক প্ৰতিবাদী শ্ল’গান দি প্ৰতিবাদকাৰীসকলে, “তেজ দিম তথাপি অসমত ‘কেব’ কাৰ্যকৰী হ’ব নিদিওঁ লাগিলে অসমীয়া জাতিয়ে দ্বিতীয়খন শৰাইঘাটৰ যুদ্ধি কৰিব” বুলি কয়।
আনহাতে চেগুনবাৰী তিনিআলিৰ মাৰ্ঘেৰিটা বিধায়ক ভাস্কৰ শৰ্মাৰ বিধায়ক কাৰ্যালয়ৰ সন্মুখত প্ৰতিবাদকাৰীয়ে টায়াৰ জ্বলাই প্ৰতিবাদ সাব্যস্ত কৰে। ইফালে সেই সময়তে অগ্নিনিৰ্বাপক বাহিনীৰ গাড়ীয়ে জুই নুমুৱাবলৈ চেষ্টা কৰা কাৰ্যক লৈ প্ৰতিবাদকাৰী আৰু আৰক্ষীৰ মাজত হতাহতিৰ সৃষ্টি হয়।
মাৰ্ঘেৰিটা আঞ্চলিক ছাত্ৰ সন্থাই শ্বহীদ দিৱস উপলক্ষে উত্তৰ মাৰ্ঘেৰিটা ৰংগমঞ্চত থকা শ্বহীদ বেদীত বন্তি প্ৰজ্বলনেৰে ৮৫৫ জন শ্বহীদলৈ শ্ৰদ্ধাঞ্জালি জ্ঞাপন কৰে।