বাৰিষাৰ আৰম্ভণিৰ লগে লগে দেশৰ একাধিক প্ৰান্তৰ পৰা দুৰ্যোগৰ খবৰ আহিছে। উত্তৰ-পূবত যোৱা দুদিনত ভূমিস্খলন আৰু বানপানীত কমেও ৩০ জন লোকৰ মৃত্যু হোৱা বুলি জানিব পৰা গৈছে।
অসমকে ধৰি অৰুণাচল প্ৰদেশ, মেঘালয়, মণিপুৰ আৰু মিজোৰাম বানত ক্ষতিগ্ৰস্ত হৈছে। বৰষুণৰ বাবে হোৱা ভূমিস্খলনতো ঠায়ে ঠায়ে জনজীৱন ব্যাহত হৈছে ভূমিস্খলনে।
আটাইতকৈ বেয়া পৰিস্থিতি অসমত। খবৰ অনুসৰি অসমৰ ১২খন জিলাত ৬০ হাজাৰৰো অধিক লোক বানত আক্ৰান্ত হৈছে।
খবৰ অনুসৰি অসমত বান আৰু ভূমিস্খলনত ৫ জন লোকৰ মৃত্যু হৈছে। বতৰ বিজ্ঞান বিভাগে জনায় যে অসমত এতিয়া বৰষুণ বন্ধ হোৱাৰ কোনো লক্ষণ দেখা পোৱা নাই। বতৰ বিজ্ঞানৰ কাৰ্যালয়ে অসমৰ একাংশ অঞ্চলৰ বাবে ৰেড আৰু অৰেঞ্জ এলাৰ্ট জাৰি কৰিছে।
অসমত বিগত ২৪ ঘন্টাত অবিৰত বৰষুণৰ ফলত ছয়খন জিলাত বান পৰিস্থিতিৰ সৃষ্টি হৈছে। ফলত ১০ হাজাৰৰো অধিক লোক বানত আক্ৰান্ত হৈছে। বৰষুণৰ ফলত পথ ভাঙি খহনীয়াত ৫ জন লোকৰ মৃত্যু ঘটিছে।
গুৱাহাটীৰ উপকণ্ঠ অঞ্চলৰ বোন্দা অঞ্চলত সংঘটিত ভূমিস্খলনত তিনিগৰাকী মহিলাৰ মৃত্যু হোৱা বুলি জানিব পৰা গৈছে। কামৰূপ মহানগৰ জিলাত ৫ জন লোকৰ মৃত্যু হোৱাৰ খবৰ পোৱা গৈছে।
বতৰ বিজ্ঞান বিভাগৰ তথ্য অনুসৰি গুৱাহাটীত এদিনতে ১১১ মিলিমিটাৰ বৰষুণ হৈ ৬৭ বছৰ পুৰণি অভিলেখ ভংগ কৰিছে। ধাৰাসাৰ বৰষুণৰ ফলত ব্ৰহ্মপুত্ৰকে ধৰি উত্তৰ-পূবৰ বহু নদীৰ জলপৃষ্ঠ বৃদ্ধি পোৱাত প্ৰশাসনক উদ্বিগ্ন কৰি তুলিছে।
আনহাতে, অৰুণাচল প্ৰদেশত মৃত্যু হোৱা লোকৰ সংখ্যা ৯ অতিক্ৰম কৰিলে। অৰুণাচল প্ৰদেশৰ পূব কামেং জিলাত ভূমিস্খলনৰ ফলত পথৰ পৰা গাড়ী তলত পৰি যোৱাত দুটা পৰিয়ালৰ ৭ জন সদস্যৰ মৃত্যু হয়।
শুকুৰবাৰে অৰুণাচল প্ৰদেশৰ বানা আৰু চেপ্পাৰ মাজৰ ১৩ নং ৰাষ্ট্ৰীয় ঘাইপথত ভূমিস্খলনৰ ফলত এখন ব্ৰেজা গাড়ী দ খাৱৈত পৰি যায়। ইয়াৰ ফলত দুৰ্ঘটনা সংঘটিত হয়। আন এখন চুমো গাড়ীও ভূমিস্খলনৰ ফলত ক্ষতিগ্ৰস্ত পথৰ কাষত আবদ্ধ হৈ পৰে যদিও সৌভাগ্যক্ৰমে কোনো লোক হতাহত হোৱা নাই। এই বাৰিষাৰ সময়ত নিশা পথত গাড়ী চলোৱাত নিষেধাজ্ঞা আৰোপ কৰিছে প্ৰশাসনে।
