উত্তৰ-পূৰ্বাঞ্চলৰ এগৰাকী প্ৰতিভাৱান ফটোগ্ৰাফাৰ ৰিচাৰ্ড বৰ্মনে আন্তঃৰাষ্ট্ৰীয় পৰ্যায়ত অসমৰ বাবে এক বিশেষ সন্মান কঢ়িয়াই আনিছে। বৰ্তমান ‘নৰ্থ-ইষ্ট নাও’ ত ভিডিঅ’ জাৰ্নেলিষ্ট হিচাপে কৰ্মৰত ৰিচাৰ্ড বৰ্মনে নিজৰ কেমেৰাৰে তোলা কেইবাখনো অৰ্থৱহ আৰু কলাত্মক ছবি ভেনিজুৱেলাৰ ৰাজধানী কাৰাকাছত অনুষ্ঠিত হোৱা এক বিশ্বমানৰ অনুষ্ঠানত প্ৰদৰ্শিত হৈছে।
এই বিশেষ সন্মানীয় অনুষ্ঠানটো হৈছে ‘VI Biennial of the South-BRICS, Peoples in Resistance, the Power of Diversity’।
জানিব পৰা মতে, এই আন্তঃৰাষ্ট্ৰীয় প্ৰদৰ্শনী অনুষ্ঠানটো ২০২৫ চনৰ ৩ অক্টোবৰৰ পৰা আৰম্ভ হৈ ২০২৬ চনৰ ১৬ জানুৱাৰীলৈকে চলিব।
উল্লেখনীয় যে, এই বিশ্বমানৰ প্ৰদৰ্শনীৰ বাবে সমগ্ৰ ভাৰতৰ পৰা মাত্ৰ দুগৰাকী শিল্পীকহে আমন্ত্ৰণ জনোৱা হৈছে, যাৰ ভিতৰত ৰিচাৰ্ড বৰ্মন অন্যতম।
জানিব পৰা মতে ভেনিজুৱেলাৰ ৰাষ্ট্ৰপতিয়েও ৰিচাৰ্ড বৰ্মনে তোলা এই ছবিসমূহ দৰ্শন কৰিছে। এগৰাকী ভিডিঅ’ জাৰ্নেলিষ্ট হিচাপে কাম কৰি থকাৰ সমান্তৰালকৈ ফটোগ্ৰাফীৰ শিল্পকৰ্মই আন্তঃৰাষ্ট্ৰীয় স্বীকৃতি লাভ কৰাটোৱে ৰিচাৰ্ডৰ প্ৰতিভাৰ প্ৰমাণ দিয়ে।
অসমৰ সামাজিক আৰু ৰাজনৈতিক দিশসমূহক ফটোৰ মাধ্যমেৰে অতি সূক্ষ্মভাৱে তুলি ধৰা ৰিচাৰ্ড বৰ্মনৰ এই সফলতাই কেৱল নৰ্থ-ইষ্ট নাও পৰিয়ালকেই নহয়, সমগ্ৰ উত্তৰ-পূৰ্বাঞ্চলক গৌৰৱান্বিত কৰি তুলিছে। তেওঁৰ এই স্বীকৃতি অসমৰ উঠি অহা ফ’টগ্ৰাফাৰসকলৰ বাবে এক অনুপ্ৰেৰণা হৈ ৰব।
