ইতিহাসৰ গ্ৰন্থত তাজমহল নিৰ্মাণৰ সৈতে জড়িত ভুল ঐতিহাসিক তথ্য সন্নিৱিষ্ট কৰাৰ অভিযোগ তুলি এনে ভুল তথ্য আঁতৰাই তাজমহল নিৰ্মাণৰ প্ৰকৃত সময় উদ্ধাৰৰ বাবে উচ্চতম ন্যায়ালয়ত দাখিল কৰা এক আবেদন আজি খাৰিজ কৰে শীৰ্ষ আদালতে।
ন্যায়াধীশ এম আৰ শ্বাহ আৰু চি টি ৰবিকুমাৰৰ দ্বাৰা গঠিত উচ্চতম ন্যায়ালয়ৰ বিচাৰপীঠে এই আবেদন নাকচ কৰি আবেদনকাৰীক এই বিষয়ত ভাৰতীয় প্ৰত্নতাত্ত্বিক জৰীপ (এ এছ আই)ৰ ওচৰত আবেদন জনাবলৈ নিৰ্দেশ দিয়ে।
আবেদনখন নাকচ কৰি বিচাৰপীঠে কয়, “আমি ইয়াত ইতিহাস পুনৰ বিচাৰ কৰিবলৈ অহা নাই। ইতিহাস চলি থাকিব দিয়ক। এই আবেদনখন বুলি খাৰিজ কৰা হৈছে। আবেদনকাৰীক এএছআইৰ ওচৰত উপস্থাপন কৰাৰ স্বাধীনতা প্ৰদান কৰা হৈছে।”
উল্লেখ্য যে সুৰজিৎ সিং যাদৱ নামৰ এগৰাকী ব্যক্তিয়ে ইতিহাসৰ কিতাপ আৰু পাঠ্যক্ৰমৰ পুথিত তাজমহল নিৰ্মাণ সন্দৰ্ভত ভুল ঐতিহাসিক তথ্য সন্নিৱিষ্ট কৰাৰ অভিযোগ উত্থাপন কৰি এই ভুল তথ্যসমূহ আঁতৰাবলৈ কেন্দ্ৰক নিৰ্দেশ দিয়াৰ অনুগ্ৰহেৰে আবেদন দাখিল কৰিছিল।
এই আবেদনত তাজমহলৰ নিৰ্মাণৰ প্ৰকৃত সময়ৰ তদন্ত কৰিবলৈও ভাৰতীয় প্ৰত্নতাত্ত্বিক জৰীপক নিৰ্দেশ দিয়াৰ বাবে উচ্চতম ন্যায়ালয়ক আহ্বান জনাইছিল আবেদনকাৰী সুৰজিৎ সিং যাদৱে।
আবেদনকাৰী যাদৱে নিজ গৱেষণাত মোগল সম্ৰাট শ্বাহজাহানৰ পত্নী মমতাজৰ মৃতদেহ ৰখা মমতাজ মহলৰ গম্বুজৰ দৰে নিৰ্মিত গঠনশৈলীত পূৰ্বৰে পৰা এক অট্টালিকা থকাৰ তথ্য উদ্ধাৰ কৰা বুলি দাবী কৰিছিল।
আবেদনখনত সুৰজিৎ সিং যাদৱে কয়, “শ্বাহজাহানৰ সকলো দৰবাৰী বুৰঞ্জীকাৰে এই সমাধিস্থলৰ স্থপতিৰ নাম কিয় উল্লেখ কৰা নাই সেয়া অত্যন্ত আচহুৱা।”
“গতিকে ইয়াৰ পৰা যথেষ্ট স্পষ্টকৈ বুজা যায় যে ৰাজা মান সিঙৰ অট্টালিকাটো ভাঙি পেলোৱা হোৱা নাছিল বৰঞ্চ কেৱল সংশোধন আৰু সংস্কাৰ কৰি সৃষ্টি কৰা হৈছিল তাজমহলৰ বৰ্তমানৰ ৰূপ। সেইবাবেই শ্বাহজাহানৰ দৰবাৰৰ বুৰঞ্জীবিদসকলৰ বিৱৰণীত কোনো স্থপতিবিদৰ উল্লেখ নাই।” আবেদনখনত যাদৱে লগতে কয়।
