অধ্যাপিকা, সুলেখিকা তথা অভিনেত্ৰী শ্ৰুতিমালা দুৱৰা আৰু নাই। সোমবাৰে গুৱাহাটীত শ্ৰুতিমালা দুৱৰাৰ মৃত্যু হয়।পুৱা ১১:১৫ বজাত তেওঁ শেষ নিশ্বাস ত্যাগ কৰে। দুৱৰা কেইবছৰমান আগতে ডিম্বাশয়ৰ কৰ্কট ৰোগত আক্ৰান্ত হৈছিল।
ড০ শ্ৰুতিমালা দুৱৰা গুৱাহাটীৰ সন্দিকৈ ছোৱালী কলেজৰ এগৰাকী সহযোগী অধ্যাপিকা তথা ইংৰাজী বিভাগৰ মুৰব্বী আছিল।
কৰ্কট ৰোগত আক্ৰান্ত হোৱাৰ পিছত শ্ৰুতিমালা দুৱৰাই ‘মাই জাৰ্নি থ্ৰু কেন্সাৰ’ শীৰ্ষক কিতাপখন লিখিছিল।
শ্ৰুতিমালা দুৱৰাৰ মৃত্যুৱে ৰাজ্যখনৰ শৈক্ষিক-সাংস্কৃতিক মহলত শোকৰ ছাঁ পেলাইছে। সামাজিক মাধ্যমত শিক্ষাবিদগৰাকীৰ মৃত্যুত ছাত্ৰ সমাজে শোক প্ৰকাশ কৰি শ্ৰদ্ধাঞ্জলি যাচিছে।
শ্ৰুতিমালা দুৱাৰা উত্তৰ-পূবৰ নইষ্ট ৰাইটাৰ্ছ ফ’ৰামৰ প্ৰতিষ্ঠাপক সদস্য আছিল।
এগৰাকী দ্বিভাষিক লেখিকা দুৱৰাৰ ইংৰাজীত লিখা তিনিখন উপন্যাস আৰু চাৰিখন চুটি গল্পৰ সংকলনৰ ভিতৰত আছে – দ্য চানছেট আৱাৰ এণ্ড আদাৰ ষ্টৰীজ (১৯৯৮), ৱেটিং ফৰ দা লাষ্ট ব্ৰেথ (১৯৯৯), দ্য ঝুলান ইভিনিং (২০০০) আৰু দ্য মিচিং লিংক।
২০১৫ চনৰ এপ্ৰিলত লায়ন্স ক্লাবে তেওঁক “নাৰী শক্তি বঁটা” প্ৰদান কৰিছিল।
২০১৬ চনত তেওঁ আন্তৰ্জাতিক মানৱ অধিকাৰ পৰিষদ, অসম খণ্ডৰ পৰা “বছৰটোৰ মহিলা” বঁটা লাভ কৰিছিল।
মৃত্যুৰ সময়ত তেওঁ দুটা সন্তান, তেওঁৰ স্বামী আৰু তেওঁৰ মাতৃ, প্ৰখ্যাত লেখিকা তথা সন্দিকৈ মহাবিদ্যালয়ৰ প্ৰাক্তন অধ্যাপিকা ডঃ মঞ্জুমালা দাসৰ লগতে তেওঁৰ পেছাদাৰী সহযোগী তথা সহকৰ্মীৰ উপৰিও প্ৰিয় বন্ধু-বান্ধৱী, গুণমুগ্ধ আৰু আত্মীয়-স্বজনক এৰি গৈছে।
