পুনৰ বিতৰ্কত জৱাহৰলাল নেহৰু বিশ্ববিদ্যালয়ৰ প্ৰাক্তন উপাচাৰ্য এম জগদীশ কুমাৰ। এইবাৰ পি এইচ ডি নামভৰ্তিত সংৰক্ষণৰ নিয়ম মানি নচলাৰ অভিযোগ। যাৰ বাবে ৰাষ্ট্ৰীয় অনুসূচিত জাতি আয়োগে জেএনইউৰ উপাচাৰ্যলৈ জাননী প্ৰেৰণ কৰিছে।
শেহতীয়াকৈ জে এন ইউৰ এগৰাকী গৱেষক ছাত্ৰ ৰাখোহৰী বাগে ২০২১-২২ শিক্ষাবৰ্ষৰ নামভৰ্তি পৰীক্ষাত সংৰক্ষণ নীতি পালন নকৰাৰ অভিযোগ উত্থাপন কৰিছে। তেওঁ দাবী কৰে যে সেই সময়ত অনুসূচিত জাতি, অনুসূচিত জনজাতি, অন্যান্য পিছপৰা শ্ৰেণী আৰু অৰ্থনৈতিকভাৱে দুৰ্বল শ্ৰেণীৰ ছাত্ৰ-ছাত্ৰীক সাক্ষাৎকাৰৰ বাবে মাতি অনা নাছিল। অৱশ্যে তেওঁলোকৰ বহুতেই সাধাৰণ শ্ৰেণীৰ ছাত্ৰ-ছাত্ৰীতকৈ বেছি নম্বৰ লাভ কৰিছিল। তেওঁ আৰু অভিযোগ কৰে যে পি এইচ ডি নামভৰ্তি প্ৰক্ৰিয়াৰ সময়ত নিয়ম উলংঘা কৰি মৌখিক পৰীক্ষাত সুযোগ পোৱা সাধাৰণ শ্ৰেণীৰ কাট অফ নম্বৰ বিভিন্ন সংৰক্ষিত শ্ৰেণীৰ তুলনাত কম ৰখা হৈছিল। গৱেষক ছাত্ৰজনৰ পৰা এই অভিযোগ পোৱাৰ পিছত এন চি এছ চিয়ে বিশ্ববিদ্যালয়ৰ উপাচাৰ্যলৈ জাননী প্ৰেৰণ কৰে। দেশৰ অন্যতম শ্ৰেষ্ঠ বিশ্ববিদ্যালয়ক নামভৰ্তি প্ৰক্ৰিয়া সন্দৰ্ভত উত্থাপিত অভিযোগ সন্দৰ্ভত বিতং তথ্য দি ১৫ দিনৰ ভিতৰত উত্তৰ দিবলৈ নিৰ্দেশ দিয়া হৈছে। নিয়ম উলংঘাৰ এই অভিযোগসমূহৰ বিষয়ে জে এন ইউয়ে অৱগত নেকি, আৰু যদি জানে তেন্তে কি ব্যৱস্থা গ্ৰহণ কৰা হৈছে বুলিও প্ৰশ্ন কৰিছে। আনহাতে এন চি এছ চিয়ে সময়মতে সঁহাৰি নোপোৱাত অধিক ব্যৱস্থা লোৱাৰ সকীয়াই দিছে৷
২০১৬ চনৰ পৰা ২০২২ চনলৈ এম জগদীশ কুমাৰে জৱাহৰলাল নেহৰু বিশ্ববিদ্যালয়ৰ উপাচাৰ্য হিচাপে ছবছৰতকৈ অধিক সময় কাৰ্যনিৰ্বাহ কৰিছিল। তাৰ পৰাই তেওঁ ইউ জি চিৰ অধ্যক্ষ পদত পদোন্নতি লাভ কৰে। তিনি বছৰতকৈও অধিক সময় তেওঁ এই পদত অধিষ্ঠিত হৈছিল। তেওঁৰ কাৰ্যকালত জে এন ইউয়ে বাৰে বাৰে শিৰোনাম দখল কৰিছিল। ২০১৬ চনত দায়িত্ব লোৱাৰ দুসপ্তাহৰ ভিতৰতে জে এন ইউত দেশদ্ৰোহৰ অভিযোগ উত্থাপন হয়। তেতিয়াৰ ছাত্ৰ সন্থাৰ সভাপতি কানহাইয়া কুমাৰ আৰু উমৰ খালিদক গ্ৰেপ্তাৰ কৰা হয়। সেই বছৰতে জেএনইউৰ পৰা নিৰুদ্দেশ হোৱা নাজিব আহমেদক আজিলৈকে কোনো সন্ধান পোৱা নাই। ২০২০ চনৰ আৰম্ভণিতে বাওঁপন্থী আৰু সাধাৰণ ছাত্ৰ-ছাত্ৰী আৰু ছাত্ৰ সন্থাৰ নেতৃত্বৰ ওপৰত এবিভিপিৰ আক্ৰমণ সংঘটিত হৈছিল। দুষ্কৃতিকাৰীৰ প্ৰহাৰৰ ফলত মূৰত আঘাতপ্ৰাপ্ত হয় তেতিয়াৰ ছাত্ৰ সন্থাৰ সভাপতি ঐষী ঘোষ। প্ৰতিবাৰেই সোঁপন্থীৰ হৈ এম জগদীশ কুমাৰৰ বিৰুদ্ধে পক্ষপাতিত্বমূলক আচৰণৰ অভিযোগ উত্থাপন হৈছিল। এইবাৰ নিজৰ কাৰ্যকালত অনিয়মৰ অভিযোগ উত্থাপন কৰা ছাত্ৰজন এবিভিপিৰ সমৰ্থক হিচাপেও পৰিচিত।
