গুগল ব্যৱহাৰকাৰীসকলৰ বাবে আহিছে এক নতুন সুবিধা। এতিয়াৰে পৰা আপুনি আপোনাৰ আধাৰ কাৰ্ডৰ তথ্য গুগল ৱালেটত অতি সহজে আৰু সুৰক্ষিতভাৱে সাঁচি ৰাখিব পাৰিব। গুগল আৰু ইউআইডিএআইৰ মাজত হোৱা এক নতুন বুজাবুজিৰ ফলত এই বিশেষ ব্যৱস্থা মুকলি কৰা হৈছে। অৱশ্যে এইটো বেংক একাউণ্ট বা পান কাৰ্ডৰ সৈতে আধাৰ লিংক কৰাৰ দৰে সম্পূৰ্ণ একে নহয়, বৰঞ্চ ই প্ৰয়োজনীয় সময়ত আপোনাৰ পৰিচয় প্ৰমাণ কৰাৰ এক সহজ আৰু ডিজিটেল উপায়হে।
এই নতুন সুবিধাৰ জৰিয়তে ব্যৱহাৰকাৰীসকলে নিজৰ ফোনত থকা গুগল ৱালেট এপত আধাৰৰ তথ্যসমূহ ইউআইডিএআইৰ অফলাইন ভেৰিফিকেচন প্ৰট‘কলৰ জৰিয়তে জমা ৰাখিব পাৰিব। গুগলে জানিবলৈ দিয়া মতে, বৰ্তমান এই সুবিধাটো পিভিআৰ আইনক্স আৰু ভাৰতমেট্ৰিমনিৰ দৰে নিৰ্বাচিত কিছুমান অংশীদাৰৰ সৈতে ব্যৱহাৰ কৰিব পৰা যাব। অতি সোনকালেই মাইগেট আৰু স্নেবিটৰ দৰে প্লেটফৰ্মতো গুগল ৱালেটৰ জৰিয়তে আধাৰ পৰীক্ষণৰ সুবিধা উপলব্ধ হ‘ব বুলি কোম্পানীটোৱে প্ৰকাশ কৰিছে।
এই ব্যৱস্থাটোৰ আটাইতকৈ আকৰ্ষণীয় দিশটো হ‘ল নিৰ্বাচিত প্ৰকাশ বা নিৰ্দিষ্ট তথ্যৰহে ব্যৱহাৰ। ইয়াৰ অৰ্থ হ‘ল এপসমূহ বা ফৰ্ম পূৰণত প্ৰমাণীকৰণৰ সময়ত আপুনি প্ৰতিবাৰেই আপোনাৰ সম্পূৰ্ণ আধাৰ কাৰ্ডৰ তথ্য প্ৰদান কৰিব নালাগে। পৰিস্থিতি অনুসৰি কেৱল প্ৰয়োজনীয় তথ্য, যেনে কেৱল নাম বা বয়সহে অংশীদাৰী কৰিব পাৰিব। গুগল ৱালেটৰ বিষয়ববীয়া এলান ষ্টেপেলবাৰ্গে উল্লেখ কৰা অনুসৰি, এই ডিজিটেল পৰিচয়ে মানুহৰ দৈনন্দিন জীৱন অধিক সহজ কৰি তুলিব আৰু গোপনীয়তা বজাই ৰাখি ব্যক্তিগত তথ্য সুৰক্ষিত কৰি ৰখাত বহু পৰিমাণে সহায় কৰিব।
