নিৰ্বাচনৰ দিন চমু চাপি অহাৰ সময়তে দেশৰ বিভিন্ন প্ৰান্তত নিৰ্বাচনী হিংসা সংঘটিত হোৱাৰ বাতৰি পোৱা গৈছে। শেহতীয়াকৈ শুকুৰবাৰে নিশা অৰুণাচল প্ৰদেশত এনে এক ঘটনা সংঘটিত হৈছে।
জানিব পৰা মতে, ৰাজ্যখনত এনএছচিএন (আই এম) উগ্ৰপন্থীয়ে এগৰাকী এনপিপি কৰ্মীক গুলীয়াই হত্যা কৰে।
ৰাজ্যখনৰ তিৰাপ জিলাৰ পশ্চিম খনছা সমষ্টিত এই ঘটনাটো সংঘটিত হৈছে। উগ্ৰপন্থীৰ গুলীত নিহত এনপিপিৰ কৰ্মীজনক জেলি আন্না বুলি চিনাক্ত কৰা হৈছে।
এই ঘটনাত উগ্ৰপন্থীৰ দলে আন এগৰাকী ব্যক্তিকো গুলীয়াই গুৰুতৰভাৱে আহত কৰে। আহত ব্যক্তি গৰাকীক চিকিৎসাৰ বাবে ডিব্ৰুগড়ৰ অসম চিকিৎসা মহাবিদ্যালয় হাস্পাতলত ভৰ্তি কৰা হৈছে।
আসন্ন লোকসভাৰ নিৰ্বাচনৰ বাবে সমগ্ৰ দেশতে সুৰক্ষা ব্যৱস্থা কটকটীয়া কৰি তোলাৰ ব্যৱস্থা গ্ৰহণ কৰা হৈছে যদিও উগ্ৰপন্থী অধ্যুষিত উত্তৰ-পূৰ্বাঞ্চলত যে সুৰক্ষা ব্যৱস্থাৰ দিশটো অধিক শক্তিশালী কৰি তোলাৰ প্ৰয়োজন সেয়া এই ঘটনাই স্পষ্ট কৰি তুলিছে।
নিৰ্বাচনৰ সময়ত ৰাজনৈতিক দলৰ নেতা-কৰ্মীক উগ্ৰপন্থী গোটবোৰে পূৰ্বৰে পৰা লক্ষ্য কৰি আহিছে আৰু বিগত সময়ত নিৰ্বাচনৰ সময়ত এনে বহু আক্ৰমণৰ ঘটনা সংঘটিত হৈছে।