এন আৰ চিৰ চূড়ান্ত খচৰাত বহুতো ভাৰতীয় নাগৰিকৰ নাম বাদ পৰা বুলি চৰ্চা চলি থকাৰ সময়তে এই সন্দৰ্ভত অসমৰ ১৪টাকৈ বাঙালী সংগঠনে শনিবাৰে কেন্দ্ৰীয় গৃহ মন্ত্ৰী ৰাজনাথ সিঙৰ সৈতে এক গুৰুত্বপূৰ্ণ বৈঠকত মিলিত হয়।
প্ৰতিনিধি দলটোৱে বৈঠকত এন আৰ চিত চিটিজেনশ্বিপ চাৰ্টিফিকেট, মাইগ্ৰেশ্যন গ্ৰহণ নকৰা, ৰে’লৱে তথা অন্যান্য চৰকাৰী দপ্তৰত চাকৰি কৰি অহা লোকৰ প্ৰমাণপত্ৰ, পেঞ্চন অৰ্ডাৰ ইত্যাদি গ্ৰহণ নকৰা, ভাৰতবৰ্ষৰ বিভিন্ন ৰাজ্যৰ পৰা বৈবাহিক সূত্ৰে অসমলৈ অহা মহিলাসকলৰ প্ৰমাণপত্ৰ গ্ৰহণ নকৰা আদি বিষয় উত্থাপন কৰে।
অসমৰ ১৪টাকৈ বাঙালী সংগঠনৰ যৌথ মঞ্চ বেংগলী ইউনাইটেড ফ’ৰাম অব আছামৰ প্ৰতিনিধি দলটোৱে প্ৰকৃত ভাৰতীয় লোকসকলৰ এন আৰ চিক লৈ হোৱা বিভিন্ন ধৰণৰ সমস্যাসমূহ সমাধান কৰাৰ বাবে কেন্দ্ৰীয় গৃহ মন্ত্ৰী ৰাজনাথ সিঙৰ সন্মুখত দাবী উত্থাপন কৰে।
প্ৰতিনিধি দলটোৱে লগতে এন আৰ চিৰ কাম চলি থকাৰ সময়ত বিদেশীৰ জাননী প্ৰদান কৰা, ডিটেনশ্যন কেম্পত নিক্ষেপ কৰা বিষয়টো গৃহ মন্ত্ৰী ৰাজনাথ সিঙৰ দৃষ্টিগোচৰ কৰে।
গৃহমন্ত্ৰীগৰাকীয়ে এই সন্দৰ্ভত অসমৰ মুখ্যমন্ত্ৰী সৰ্বানন্দ সোণোৱালৰ সৈতে কথা পাতিব বুলি ফ’ৰামক আশ্বাস দিয়ে। তদুপৰি, গৃহ মন্ত্ৰী ৰাজনাথ সিঙে এন আৰ চি সুকলমে পাৰ হৈ যোৱাৰ পাছত ‘হিন্দু’সকলৰ সকলো সমস্যা সমাধান কৰা হ’ব বুলি আশ্বাস দিয়াৰ লগতে এন আৰ চিৰ পৰা এজনো প্ৰকৃত ভাৰতীয়ৰ নাম বাদ নপৰে বুলিও প্ৰতিনিধি দলটোক স্পষ্ট কৰি দিয়ে।
উল্লেখ্য যে ফ’ৰামৰ মুখ্য সমন্বয়ক মহানন্দ সৰকাৰ দত্ত, সদৌ অসম বাঙালী জাতীয় পৰিষদৰ সভাপতি ফণী বৈশ্য, নাগৰিক অধিকাৰ সুৰক্ষা সংগ্ৰাম সমিতিৰ সভাপতি অৰুণ ৰায়, সদৌ অসম বাঙালী যুৱ-ছাত্ৰ ফেডাৰেশ্যনৰ সাধাৰণ সম্পাদক সম্প্ৰাট ভাওৱালৰ নেতৃত্বত যোৱা প্ৰতিনিধি দলটোৱে শনিবাৰে নতুন দিল্লীত আকবৰ ৰোডস্থিত গৃহ মন্ত্ৰীৰ বাসভৱনত দিনৰ ১০ বজাত গৃহ মন্ত্ৰীক সাক্ষাৎ কৰে।
আনহাতে, বেংগলী ইউনাইটেড ফ’ৰাম অব আছামৰ প্ৰতিনিধি দলটোৱে ৩৬ দফীয়া দাবী প্ৰস্তুত কৰি কেন্দ্ৰীয় গৃহমন্ত্ৰী গৰাকীক এখন স্মাৰকপত্ৰও প্ৰদান কৰে।
