দলগাৱঁৰ ওন্দোলাঝাৰত পৰিত্যক্ত অৱস্থাত উদ্ধাৰ এন আৰ চিৰ নথি; তদন্তৰ নিৰ্দেশ উপায়ুক্তৰ
অসমত চলি থকা এন আৰ চি উন্নীতকৰণ প্ৰক্ৰিয়াটোৰে এটা অংশ ‘দাবী আৰু আপত্তি’ প্ৰক্ৰিয়াটো আজিৰ পৰা আৰম্ভ হোৱাৰ সময়তে দৰং জিলাৰ দলগাওঁ ৰাজহচক্ৰৰ অন্তৰ্গত ওন্দোলাঝাৰত পৰিত্যক্ত অৱস্থাত এন আৰ চিৰ নথি উদ্ধাৰ হোৱা ঘটনাই এক প্ৰকাৰৰ চাঞ্চল্যৰ সৃষ্টি কৰিছে।
ইতিমধ্যে ঘটনাটো সন্দৰ্ভত দৰং জিলাৰ উপায়ুক্তই অতিৰিক্ত উপায়ুক্ত তথা এন আৰ চিৰ জিলা সমন্বয় বিষয়া বিদ্যুৎ বিকাশ ভাগৱতীক তদন্তৰ নিৰ্দেশ দিছে। যিমান পাৰি সিমান সোনকালে ইয়াৰ প্ৰতিবেদন দিবলৈও নিৰ্দেশ দিছে উপায়ুক্তজনে।
উল্লেখযোগ্য যে ওন্দোলাঝাৰ গাওঁ পঞ্চায়তৰ অন্তৰ্গত স্থানীয় কিছু সংখ্যক লোকে আজি এই নথিখিনি উক্ত গাওঁ পঞ্চায়তৰ সৈতে সংলগ্ন এন আৰ চি ২৭ নং সেৱা কেন্দ্ৰটোৰ পিছফালে এটা পৰিত্যক্ত স্থানৰ পৰা উদ্ধাৰ কৰে। লোকসকলে দাবী কৰিছে যে ইয়াত কিছুমান গুৰুত্বপূৰ্ণ নথিও আছে, যিবোৰৰ মাজত লিগেচি ডাটা পুনৰীক্ষণৰ সৈতে সম্পৰ্ক থকা নথিও আছে। ইয়াৰ উপৰি তেওঁলোকে দাবী কৰামতে, এইবোৰৰ মাজত জিলা দণ্ডাধীশৰ অনুসন্ধানকাৰী দলৰ প্ৰতিবেদনো আছে, যিবোৰত জিলা নাগৰিকপঞ্জীৰ পঞ্জীয়ন কৰ্তৃপক্ষৰ ছীল-মোহৰ আৰু চহী পোৱা গৈছে। নথিবোৰ এটা প্লাষ্টিকৰ বেগৰ ভিতৰত ভৰোৱা আছিল। স্থানীয় লোকসকলে এন আৰ চি সেৱাকেন্দ্ৰটোৰ বিষয়াসকলৰ দায়িত্বহীনতাৰ ফলতেই এয়া হোৱা বুলি অভিযোগ তুলিছে আৰু ইয়াৰ তদন্ত কৰি দোষী বিষয়াক শাস্তিৰ দাবী কৰিছে।
আনহাতে এন আৰ চিৰ স্থানীয় পঞ্জীয়ক জগত জীৱন দত্তই স্থানীয় লোকসকলৰ অভিযোগ পোনচাতেই অস্বীকাৰ কৰিছে। তেওঁ কয় যে সেইবোৰ পেলনীয়া কাগজহে। অৱশ্যে সেয়া কেনেকৈ ইয়াত উদ্ধাৰ হ’বলৈ পালে তাৰ ব্যাখ্যা দিব নোৱাৰিলে বিষয়াজনে।
তাৎপৰ্য্যপূৰ্ণ কথাটো হ’ল- উক্ত এন আৰ চি সেৱাকেন্দ্ৰটোৰ অধীনৰ কেৱল ৩০ শতাংশ লোকৰ নামহে এন আৰ চিৰ খচৰাত অন্তৰ্ভুক্ত হ’ল।