অৰুণাচলৰ ডিৰাঙত অৱস্থিত নেশ্যনেল ৰিছাৰ্চ চেণ্টাৰ অন য়াক (National Research Centre on Yaks চমুকৈ NRCY) নামৰ প্ৰতিষ্ঠানটোৱে য়াকৰ নোম আৰু মৰাপাটৰ আঁহৰ মিশ্ৰনেৰে এবিধ নতুন ঊণ প্ৰস্তুত কৰিছে। এই নতুন ঊণবিধ মেৰিনো ঊণৰ তুলনাত ৪০ শতাংশ অধিক উমাল বুলি জানিব পৰা গৈছে।
বিজ্ঞানীসকলৰ মতে, এই ঊণৰ পৰা প্ৰস্তুত সাজ-পোছাকে অতি বেগুণীয়া ৰশ্মি ৰোধ কৰিব, ওজনত লঘূ আৰু অনা নিয়া কৰাত সহজ আৰু দেহৰ পৰা নিৰ্গত ঘাম শোষণ কৰি ততালিকে বায়ুমণঅডলত এৰি দিব পাৰে। শীতৰ সময়ৰ পিন্ধাৰ বাবে এই ঊণৰ পৰা প্ৰস্তুত অতি সুবিধাজনক আৰু এই পোছাকে ৪০ ডিগ্ৰী চেলছিয়াছ তাপ মান সহ্য কৰিব পাৰে।
ইতিমধ্যে এই গৱেষণা প্ৰতিষ্ঠানটোৱে প্ৰায় ৩০গৰাকী য়াক পালকক উক্ত ঊণেৰে জেকেট, ছুৱেটাৰ, টুপী আদি প্ৰস্তুত কৰাৰ প্ৰশিক্ষণ প্ৰদান কৰিছে।
এই য়াক পালকসকলক কলিকতাৰ আইচিএআৰ-নেশ্যনেল ইন্সটিটিউট অব ৰিছাৰ্চ অন জুট এণ্ড এলাইড ফাইবাৰ টেকন’লজি নামৰ প্ৰতিষ্ঠানটোৱে প্ৰশিক্ষণ প্ৰদান কৰিছে।
নেশ্যনেল ৰিছাৰ্চ চেণ্টাৰ অন য়াকৰ বিজ্ঞানী তৰুণপাল সিঙে কৈছে যে এই সাজ-পোছাক ইতিমধ্যে কিছু সংখ্যক পৰ্যটকে ক্ৰয় কৰিছে। উক্ত সাজ-পোছাকসমূহ প্ৰতিষ্ঠানটোত প্ৰদৰ্শনৰ বাবে থোৱা আছিল।
বিজ্ঞানীগৰাকীয়ে আৰু জনাইছে যে প্ৰতিষ্ঠানটোৱে বৰ্তমান ইয়াৰ বাণিজ্যিক উৎপাদনৰ বাবে পোছাক প্ৰস্তুত কৰা কোম্পানী অথবা দক্ষতা বিকাশ গোটৰ সন্ধানত আছে।
বিজ্ঞানী সিঙে আৰু কৈছে যে য়াক পালকসকলক কেনেদৰে য়াকৰ নোমৰ উদ্ভাৱনীমূলক ব্যৱহাৰ কৰিব লাগে তাক শিকোৱা হৈছে। ইয়াৰ পূৰ্বে য়াক পালকসকলে য়াকৰ নোম পেলনীয়া সামগ্ৰী হিচাপে ব্যৱহাৰ কৰিছিল আৰু ৰছী প্ৰস্তুত কৰিছিল। উল্লেখ্য যে অৰুণাচলৰ টাৱাং আৰু পশ্চিম কামে জিলাত ১৩,০০০ৰো অধিক য়াক আছে।
