দেশজুৰি এতিয়া মকৰা জালৰ দৰে বিয়পি পৰিছে ডিজিটেল গ্ৰেপ্তাৰৰ ভয়ংকৰ জালিয়াতি। শেহতীয়াকৈ এই প্ৰৱঞ্চনাৰ জালত পৰি সৰ্বস্বান্ত হ’বলগীয়া হৈছে এহাল জ্যেষ্ঠ চিকিৎসক দম্পতী। দক্ষিণ দিল্লীৰ গ্ৰেটাৰ কৈলাশ অঞ্চলৰ বাসিন্দা এই দম্পতীহালক প্ৰৱঞ্চকৰ দলে প্ৰায় দুসপ্তাহ ধৰি ডিজিটেলি গ্ৰেপ্তাৰ কৰি ৰাখিছিল আৰু তেওঁলোকৰ পৰা প্ৰায় ১৪ কোটি টকা লুট কৰি লৈ গৈছিল। এই ঘটনাক কেন্দ্ৰ কৰি বৰ্তমান সমগ্ৰ দেশতে তীব্ৰ চাঞ্চল্যৰ সৃষ্টি হৈছে আৰু আৰক্ষীয়ে সমগ্ৰ বিষয়টোৰ তদন্ত আৰম্ভ কৰিছে।
আৰক্ষীৰ সূত্ৰৰ পৰা জানিব পৰা মতে, ভুক্তভোগী দম্পতী ডাঃ ওম তানিজা আৰু তেওঁৰ পত্নী ইন্দিৰা তানিজা দীৰ্ঘদিন ধৰি বিদেশত আছিল। প্ৰায় ৪৮ বছৰ ধৰি আমেৰিকাত বাস কৰা এই চিকিৎসক দম্পতীয়ে ৰাষ্ট্ৰসংঘৰ দৰে আন্তৰ্জাতিক সংস্থাতো কাম কৰিছিল। ২০১৫ চনত তেওঁলোক ভাৰতলৈ উভতি আহে আৰু বৰ্তমান দিল্লীত বসবাস কৰি আছে। যিহেতু তেওঁলোকৰ পুত্ৰ বিদেশত থাকে, সেয়েহে বৃদ্ধ দম্পতীহাল ঘৰত অকলেই আছিল আৰু এই সুযোগটোকে গ্ৰহণ কৰিছিল চাইবাৰ অপৰাধীৰ দলটোৱে।
এই সমগ্ৰ প্ৰৱঞ্চনাৰ ঘটনাটো যোৱা বৰ্ষৰ ২৪ ডিচেম্বৰৰ পৰা ১০ জানুৱাৰীৰ ভিতৰত সংঘটিত হৈছিল। অভিযুক্তসকলে নিজকে আৰক্ষী আৰু চোৰাংচোৱা সংস্থাৰ উচ্চপদস্থ বিষয়া বুলি পৰিচয় দিছিল। তেওঁলোকে দম্পতীহালক এটা ভিডিঅ’ কলৰ জৰিয়তে ডিজিটেল গ্ৰেপ্তাৰৰ ভয় দেখুৱাইছিল আৰু তেওঁলোকৰ ওপৰত ২৪ ঘণ্টাই চকু ৰাখিছিল। এই ১৭ দিনৰ ভিতৰত প্ৰৱঞ্চকসকলে ইন্দিৰা তানিজাৰ ৮টা বিভিন্ন বেংক একাউণ্টৰ পৰা পৰ্যায়ক্ৰমে মুঠ ১৪.৮৫ কোটি টকা কৌশলেৰে হস্তান্তৰ কৰি লৈ যায়।
চিকিৎসক দম্পতীহালে সংবাদ মাধ্যমৰ আগত জনোৱা অনুসৰি, প্ৰৱঞ্চকসকলে তেওঁলোকক ইমানেই ভয় খুৱাইছিল যে তেওঁলোকে কাকো একো ক’বলৈ সাহস কৰা নাছিল। গ্ৰেপ্তাৰ কৰা আৰু আইনী জটিলতাত পেলোৱাৰ ভাবুকি দি তেওঁলোকক মানসিকভাৱে বন্দী কৰি ৰখা হৈছিল। অৱশেষত ১০ জানুৱাৰীত দম্পতীহালে বুজিব পাৰে যে তেওঁলোক এক ডাঙৰ ষড়যন্ত্ৰৰ বলি হৈছে। লগে লগে তেওঁলোকে দিল্লী আৰক্ষীৰ ওচৰত এজাহাৰ দাখিল কৰে আৰু বৰ্তমান চাইবাৰ ক্ৰাইম উইঙে এই ৰহস্যজনক ঘটনাৰ তদন্ত চলাই আছে। কেন্দ্ৰীয় চৰকাৰে এনে অপৰাধৰ বিৰুদ্ধে সজাগতা চলাই থকাৰ পাছতো শিক্ষিত লোকসকল এনেদৰে চিকাৰ হোৱাটোৱে সকলোকে চিন্তিত কৰি তুলিছে।
