চাৰু বৰদলৈ ফাউণ্ডেছনে প্ৰখ্যাত নৃত্য নিপুন চাৰু বৰদলৈৰ ১০০ সংখ্যক জন্ম জয়ন্তী উদযাপন কৰি আহিছে। নৃত্য নিপুন গৰাকীৰ জন্ম জয়ন্তীৰ সৈতে সংগতি ৰাখি চলিত বৰ্ষৰ ৩১ ডিচেম্বৰত গুৱাহাটীৰ ৰবীন্দ্ৰ ভৱনত উন্মোচন কৰা হ’ব নৃত্য নিপুন প্ৰয়াত চাৰু বৰদলৈৰ আত্মজীৱনী “My Life And Art Divine”।
উল্লেখ্য, অসমৰ সাংস্কৃতিক জগত খনলৈ চাৰু বৰদলৈৰ অৱদান অতুলনীয়।
তেওঁ অসম ৰাজ্যিক সংগীত মহাবিদ্যালয় ( বৰ্তমান এল কে আৰ বি ৰাজ্যিক সংগীত মহাবিদ্যালয় হিচাবে জনাজাত) ৰ প্ৰতিষ্ঠাপক অধ্যক্ষ হিচাবে কাৰ্যনিৰ্বাহ কৰাৰ লগতে কথক নৃত্যৰ ক্ষেত্ৰত ৰাজ্যৰ এগৰাকী পথিকৃতৰ ভূমিকা পালন কৰিছিল।
গ্ৰামোফোন ৰেকৰ্ডৰ শিল্পী হিচাবেও তেওঁৰ সুনাম আছিল।
‘ৰূপহী’ (১৯৪১), ‘বদন বৰফুকন’ (১৯৪৭) আদিৰ লেখীয়া অসমীয়া চলচ্চিত্ৰতো তেওঁ হৃদয়স্পৰ্শী অভিনয় কৰিছিল।
তেওঁ অসম শাস্ত্ৰীয় সংগীত সন্থাৰ প্ৰতিষ্ঠাপক সভাপতি আছিল।অল আছাম মিউজিক কনফাৰেন্সো তেওঁৰ প্ৰচেষ্টাতে গঠন হৈছিল।
নতুন প্ৰজন্মক নৃত্য চৰ্চাৰ সৈতে জড়িত কৰোৱাৰ উদ্দেশে চাৰু বৰদলৈয়ে প্ৰতিষ্ঠা কৰিছিল অসমৰ অতি পুৰণি নৃত্যৰ বিদ্যালয় নৰ্তন নিকেতন।
তেওঁৰ উল্লেখযোগ্য শিষ্যসকলৰ ভিতৰত ৰাজ্যৰ এগৰাকী আগশাৰীৰ নৃত্য বিশাৰদ সংগীত নাটক অকাডেমী বঁটা বিজয়ী ৰামকৃষ্ণ তালুকদাৰ, মৰমী মেধি আদি অন্যতম।
অসমৰ সাংস্কৃতিক জগত খনলৈ অনবদ্য অৱদান আগবঢ়াই যোৱা চাৰু বৰদলৈৰ কৰ্মৰাজিক জীয়াই ৰখাৰ লগতে সেইবোৰৰ প্ৰকৃত সংৰক্ষণৰ উদ্দেশ্যে গঠন কৰা হৈছিল চাৰু বৰদলৈ ফাউণ্ডেছন।
১৯২১ চনৰ ডিচেম্বৰ মাহত গুৱাহাটীৰ শিলপুখুৰীত জন্মগ্ৰহণ কৰিছিল চাৰু বৰদলৈয়ে।
তেওঁৰ পিতৃৰ নাম আছিল আনন্দী বৰদলৈ আৰু মাতৃ আছিল দেবৱালা বৰদলৈ। অসমৰ সংগীত-নৃত্যৰ জগতখনলৈ অতুলনীয় অৱদান আগবঢ়াই যোৱা চাৰু বৰদলৈৰ মৃত্যু হৈছিল ১৯৯০ চনৰ ২ ডিচেম্বৰত।
মৃত্যুৰ সময়ত তেওঁৰ বয়স হৈছিল ৬৯ বছৰ। এইগৰাকী মহান নৃত্য নিপুনৰেই আত্মজীৱনী উন্মোচন কৰা হ’ব ৩১ ডিচেম্বৰত।
