জাতীয় নায়কৰ সন্মান শিৰত লৈয়েই কালি সৰ্বানন্দ সোণোৱালে হাঁহি মুখে এৰি দিলে তেওঁৰ মুখ্যমন্ত্ৰীৰ চকীখন। সচৰাচৰ বহু ক্ষেত্ৰত দেখা দিয়া বিসম্বাদৰ তিলমানো চিন ফুটি নুঠিল তেওঁৰ মুখত।
সৰ্বানন্দ সোণোৱালৰ এনে আচৰণক এতিয়া ছ’চিয়েল মিডিয়াৰ লগতে আন মিডিয়াতো এক ত্যাগ বুলি অভিহিত কৰিছে। সংসদীয় গণতন্ত্ৰত এনে ৰদ-বদল ডাঙৰ কথা নহয় যদিও বিদায়ী মুখ্যমন্ত্ৰী সোণোৱালে ইয়াকেলৈ মুঠেও মুকলিকৈ পৰিতাপ কৰা।
ইয়াৰ বিপৰীতে সৰ্বানন্দ সোণোৱালে মুখ্যমন্ত্ৰী হিমন্ত বিশ্ব শৰ্মাক আদৰণিহে জনালে।
বিদায়ী মুখ্যমন্ত্ৰীগৰাকীয়ে আজি পুনৰ ৰাজ্যত আন এক নজিৰ গঢ়িলে। যিটো সময়ত অসমকে ধৰি দেশৰ বিভিন্ন ৰাজ্যত প্ৰাক্তন মুখ্যমন্ত্ৰী একাংশই ক্ষমতাৰ পৰা আঁতৰি যোৱাৰ পিছতো Z+ কেটেগৰীৰ নিৰাপত্তা এৰি দিবলৈ বিচৰা নাছিল, সেই সময়তে পদত্যাগৰ পিছতে বিদায়ী মুখ্যমন্ত্ৰী সৰ্বানন্দ সোণোৱালে তেওঁৰ Z+ কেটেগৰীৰ নিৰাপত্তা এৰি দিয়ে।
এতিয়াৰে পৰা মাজুলীৰ বিধায়ক প্ৰাক্তন মুখ্যমন্ত্ৰী সৰ্বানন্দ সোণোৱালৰ সোঁৱে-বাঁৱে নাথাকিব কোনো Z+ কেটেগৰীৰ নিৰাপত্তা ৰক্ষী। ইয়াৰ বিপৰীতে মাত্ৰ তিনিজন নিৰাপত্তাৰক্ষীয়ে পহৰা দিব সোণোৱালৰ বাসভৱন।
আন বিধায়কে লাভ কৰা নিৰাপত্তাই গ্ৰহণ কৰিব সৰ্বানন্দ সোণোৱালে।
উল্লেখ্য কেন্দ্ৰীয় চৰকাৰে দেশৰ ভিভিআইপিৰ Z+ কেটেগৰীৰ নিৰাপত্তাত নিয়োজিত ৰাষ্ট্ৰীয় সুৰক্ষা গাৰ্ডক ভিভিআইপিৰ নিৰাপত্তাৰ পৰা আঁতৰাই দেশৰ নিৰাপত্তাত নিয়োজিত কৰাৰ পোষকতা কৰিছিল।
সেইমৰ্মে গান্ধী পৰিয়ালকে ধৰি দেশৰ বহু ভিভিআইপিৰ নিৰাপত্তাৰ পৰা এনএছজি আঁতৰাই আনি তাৰ ঠাইত চিআৰপিএফ আৰু চিআইএছএফৰ জোৱান নিয়োজিত কৰাৰ সিদ্ধান্ত লোৱা হৈছিল।
চৰকাৰৰ এনে সিদ্ধান্তত বহুতে অসন্তুষ্টিও ব্যক্ত কৰিছিল।
দৰাচলতে এনএছজিৰ কাম ভিভিআইপিক নিৰাপত্তা দিয়া নহয়, তেওঁলোকৰ কাম হৈছে সংকটৰ সময়ত বিশেষকৈ সন্ত্ৰাসবাদী আদিৰ আক্ৰমণত দেশক সুৰক্ষা দিয়া।
সেইবাবেই ভিভিআইপিৰ নিৰাপত্তাৰ পৰা এনএছজি আঁতৰ কৰাৰ পোষকতা কৰা হৈছিল।
আনকি কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙৰ নিৰাপত্তাত নিয়োজিত এনএছজিও প্ৰত্যাহাৰ কৰি তাৰ ঠাইত চিআৰপিএফ মোতায়েন কৰাৰ সিদ্ধান্ত লোৱা হৈছিল।
এনএছজিৰ নিৰাপত্তা বাহাল ৰখা হৈছিল প্ৰাক্তন মুখ্যমন্তী মায়াৱতী, ফাৰুক আব্দুল্লা,চন্দ্ৰবাবু নাইডুকে ধৰি অসমৰ মুখ্যমন্ত্ৰী সৰ্বানন্দ সোণোৱালৰ।
কিন্তু ৰাষ্ট্ৰীয় নিৰাপত্তক আগস্থান দি বিদায়ী মুখ্যমন্ত্ৰী সৰ্বানন্দ সোণোৱালে ত্যাগ কৰিলে তেওঁৰ এনএছজি নিৰাপত্তা।বিদায়ী মুখ্যমন্ত্ৰী সৰ্বানন্দ সোণোৱালৰ এয়াও এক এক ত্যাগৰ নিদৰ্শন বুলি বহুতে আলোচনা কৰিছে।
