শেহতীয়াকৈ সৰ্বভাৰতীয় চিকিৎসা প্ৰৱেশ পৰীক্ষা NEET-UG য়ে সমগ্ৰ দেশতে এক বৃহৎ আলোড়নৰ সৃষ্টি কৰিছিল। এইবাৰ সেই পৰীক্ষাৰ পদ্ধতি সলনি হ’বলৈ গৈ আছে। পৰম্পৰাগত অ’এমআৰ (পেন-এণ্ড-পেপাৰ) পদ্ধতিৰ পৰিৱৰ্তে কম্পিউটাৰ ভিত্তিক বা চিবিটিৰ জৰিয়তে পৰীক্ষা অনুষ্ঠিত হ’ব। তাৰ বাবে প্ৰস্তুতি চলাইছে নেশ্যনেল টেষ্টিং এজেন্সি বা এন টি এ-ই।
সৰ্বভাৰতীয় সংবাদ মাধ্যমত এই কথা প্ৰকাশ পাইছে। এনটিএৰ সঞ্চালক প্ৰধান অভিষেক সিঙে কয়, ‘চিবিটিই হৈছে ভৱিষ্যত’। সেয়ে অতি শীঘ্ৰে ডিজিটেল মাধ্যমেৰে মেডিকেল প্ৰৱেশ পৰীক্ষা প্ৰৱৰ্তন কৰা হ’ব।
সংবাদ সংস্থা এ এন আইৰ সৈতে হোৱা এক সাক্ষাৎকাৰত অভিষেক সিঙে কয় যে বৰ্তমান NEET-UGE হৈছে অফলাইনত অনুষ্ঠিত হৈ থকা একমাত্ৰ ৰাষ্ট্ৰীয় পৰ্যায়ৰ পৰীক্ষা। ইতিমধ্যে সমগ্ৰ দেশতে অনলাইনযোগে JEE Main, CUET, UGC-NET, NIFTৰ দৰে সৰ্বভাৰতীয় পৰীক্ষাসমূহ চলি আছে। ইনফ’ছিছৰ সহ-প্ৰতিষ্ঠাপক নন্দন নিলেকানীৰ নেতৃত্বত গঠিত উচ্চ ক্ষমতাসম্পন্ন টাস্ক ফ’ৰ্চৰ পৰামৰ্শ মতে এই পৰীক্ষাৰ ৰূপৰেখা প্ৰস্তুত কৰা হৈছে।
জানিব পৰা মতে ২০ লাখৰো অধিক পৰীক্ষাৰ্থীক অনলাইন পৰীক্ষাৰ বাবে উপযোগী কৰি তোলাৰ বাবে কেইবাটাও পদক্ষেপ গ্ৰহণ কৰা হৈছে। প্ৰথমতে পৰীক্ষাৰ আন্তঃগাঁথনি সম্প্ৰসাৰণৰ ব্যৱস্থা কৰা হৈছে। বৃহৎ সংখ্যক পৰীক্ষাৰ্থীৰ হেঁচা চম্ভালিবলৈ সমগ্ৰ দেশতে কম্পিউটাৰ টেষ্টিং চেণ্টাৰৰ সংখ্যা বৃদ্ধি কৰা হৈছে। চাইবাৰ সুৰক্ষা বৃদ্ধিৰ বাবেও এন টি এয়ে কাম কৰি আছে।
চাৰ্ভাৰৰ ভুল, অত্যধিক চাপ বা অকৰ্তৃত্বশীল চাৰ্ভাৰ ব্যৱহাৰ প্ৰতিৰোধ কৰিবলৈ উন্নত চাইবাৰ সুৰক্ষা ব্যৱস্থা বিকশিত কৰা হৈছে। পৰীক্ষাত নকল ৰোধ কৰিবলৈ এআই আৰু ডাটা এনালাইটিক্স সঁজুলিও ব্যৱহাৰ কৰা হ’ব।
অফলাইন পৰীক্ষাৰ সৈতে জড়িত বিভিন্ন অনিয়ম আৰু আইনী জটিলতাক লৈ সমালোচনাৰ পিছত NEET-UGত এই ডিজিটেল পদ্ধতিৰ ব্যৱহাৰৰ ওপৰত গুৰুত্ব আৰোপ কৰা হৈছে। ফলত সংশ্লিষ্ট বিষয়াসকলে ধাৰণা কৰে যে প্ৰশ্নকাকত ফাদিল হোৱা, পৰিবহণৰ ক্ষেত্ৰত সুৰক্ষাৰ বিপদ, উত্তৰবহীৰ মূল্যায়নত মানৱীয় ভুলৰ পৰা বহুলাংশে এৰাই চলা সম্ভৱ হ’ব। অৱশ্যে এই ডিজিটেল পৰীক্ষণ ব্যৱস্থা কেতিয়া আৰম্ভ হ’ব সেয়া এতিয়াও বিশেষভাৱে ঘোষণা কৰা হোৱা নাই।
