মুখ্য মন্ত্ৰী সৰ্বানন্দ সোণোৱালে ৰাজ্যখনৰ আৰক্ষী সঞ্চালক প্ৰধানগৰাকীক ছিণ্ডিকেটৰ বিৰুদ্ধে কঠোৰ ব্যৱস্থা গ্ৰহণৰ নিৰ্দেশ দিয়াৰ এদিন পাছতে আৰক্ষীয়ে গৰুৰ এটা আন্ত:ৰাষ্ট্ৰীয় চোৰাং ব্যৱসায়ী চক্ৰ উৎখাত কৰাৰ লগতে যোৱা ৪৮ ঘন্টাত চক্ৰটোৰ সৈতে জড়িত থকা ১৬ জন লোকক আটক কৰিছে।
আৰক্ষীয়ে লগতে বাংলাদেশলৈ চালান দিবলৈ নিয়া কমেও ১৩টা গৰু জব্দ কৰিছে। আৰক্ষীয়ে জানিবলৈ দিয়া মতে ১৬ জন লোকক ধুবুৰী জিলাৰ বিভিন্ন স্থানৰ পৰা আটক কৰা হৈছে।
‘’ বিগত ৪৮ ঘন্টাত আমি ধুবুৰী জিলাৰ বিভিন্ন স্থানত তালাচী অভিযান চলাইছো আৰু এই লোককেইজনক আটক কৰাৰ লগতে গৰুকেইটা জব্দ কৰিছো। আমি লগতে চাৰিখন ডাম্পাৰ, আন্ত:ৰাষ্ট্ৰীয় সীমান্তৰ কাঁটাতাঁৰ কটাৰ সঁজুলি আৰু বহু আপত্তিজনক সামগ্ৰী তেওঁলোকৰ জিম্মাৰ পৰা উদ্ধাৰ কৰিবলৈ সক্ষম হৈছো,’’- অসম আৰক্ষীৰ এগৰাকী জ্যেষ্ঠ বিষয়াই জানিবলৈ দিয়ে।
তেওঁ কয় যে চোৰাং ব্যৱসায়ীকেইজনে সীমান্ত অতিক্ৰম কৰিবলৈ সুযোগৰ অপেক্ষাত আছিল।
‘’তেওঁলোকে আচলতে সীমান্তৰ সিপাৰলৈ গৰু প্ৰেৰণ কৰাৰ বাবে ডাৱৰীয়া বতৰৰ বাবে অপেক্ষা কৰিছিল। তেওঁলোকে প্ৰথমতেগৰুবোৰ আন্ত:ৰাষ্ট্ৰীয় সীমান্তৰ সমীপলৈ লৈ যায় আৰু তাৰপাছত বিভিন্ন আহিলাৰ প্ৰয়োগ কৰি কাঁটাতাঁৰ কাটি গৰুবোৰ সীমান্তৰ সিপাৰলৈ পঠিয়ায়,’’-তেওঁ কয়।
ধুবুৰী জিলাই বাংলাদেশৰ সৈতে আন্ত:ৰাষ্ট্ৰীয় সীমান্ত ভগাই লৈছে আৰু গৰুৰ চোৰাং ব্যৱসায়ীয়ে গৰুৰ চোৰাং ব্যৱসায়ৰ উপৰি আন সামগ্ৰী তথা জালনোট, সুৰা আদি সৰবৰাহ কৰি আহিছে।
চোৰাং ব্যৱসায়ীসকলক প্ৰায়েই ভাৰত-বাংলা সীমান্তত থকা আৰক্ষী তথা সীমান্ত সুৰক্ষা বাহিনীকে ধৰি সুৰক্ষা সংস্থাসমূহে নজৰত ৰাখি আহিছে।
চলিত বছৰৰ এপ্ৰিল মাহত সীমান্ত সুৰক্ষা বাহিনীয়ে ৪৯৯ টা গৰু, ১,৫১৪ বটল সুৰা, ২৬৪০ পেকেট বিড়ি, ৪.৭৬ কোটি টকাৰ মূল্যৰ ১৫০ বাকচ ছুপাৰীকে ধৰি ২,০৫কোটি টকা মূল্যৰ সামগ্ৰী জব্দ কৰে। তদুপৰি, সীমান্ত সুৰক্ষা বাহিনীয়ে এই কাৰবাৰৰ সৈতে জড়িত থকা ২৩ জন ভাৰতীয় নাগৰিক আৰু ১৩ জন বাংলাদেশী নাগৰিককে ধৰি ৩৬ জন লোকক গ্ৰেপ্তাৰ কৰিছে।
