জনবহুল চহৰৰ মাজত কোনোৱাই স্থাপন কৰি থৈ গ’ল প্ৰধানমন্ত্ৰীৰ উলংগ প্ৰতিমূৰ্তি, ক’ত?
মানুহেৰে গিজগিজাই থকা চহৰৰ এচুকত কোনো লোকে স্থাপন কৰি থৈ গ’ল প্ৰধানমন্ত্ৰীৰ এটা বিশাল প্ৰতিমূৰ্তি।
চহৰৰ মাজৰ প্ৰধানমন্ত্ৰীৰ প্ৰতিমূৰ্তি স্থাপন কৰাটো একো ডাঙৰ কথা নহয় যদিও ডাঙৰ কথাটো হ’ল যিটো প্ৰতিমূৰ্তি স্থাপন কৰা হৈছে সেয়া হৈছে প্ৰধানমন্ত্ৰীগৰাকীৰ এটা সম্পূৰ্ণ উলংগ প্ৰতিমূৰ্তি।
পুৱাৰ ভাগত মূৰ্তিটো প্ৰত্যক্ষ কৰি আৰক্ষীও হতবাক হৈ পৰিল। লগে লগে আৰক্ষীয়ে মূৰ্তিটো ঢাকি ৰখাৰ ব্যৱস্থা কৰিলে আৰু পিছত মূৰ্তিটো সেই স্থানৰ পৰা আঁতৰাই নিলে।
প্ৰধানমন্ত্ৰীৰ নগ্ন প্ৰতিমূৰ্তি স্থাপনৰ ঘটনাটো ঘটিছে ইজৰাইলত।
অহা ২৩ মাৰ্চত নিৰ্বাচন অনুষ্ঠিত হ’বলগীয়া ইজৰাইলত নিশাৰ আন্ধাৰত কোনো লোকে দেশ খনৰ ব্যস্ত চহৰ তেল আভিভৰ হাবিমা স্কোৱেৰত স্থাপন কৰি থৈ গ’ল প্ৰধানমন্ত্ৰী বেঞ্জামিন নেতান্যাহুৰ এটা উলংগ প্ৰতিমূৰ্তি।
ক’ৰ’ণাৰ সংহাৰৰ পিছত নেতান্যাহুৱে ইজৰাইলৰ অৰ্থনীতি পুনৰুজ্জীৱিত কৰাৰ ক্ষেত্ৰত ব্যৰ্থ হোৱাৰ বিৰুদ্ধে এতিয়া দেশ খনৰ জনতা জাগি উঠিছে।
ইতিমধ্যে প্ৰধানমন্ত্ৰীগৰাকীৰ বিৰুদ্ধে দেশ খনত ব্যাপক আন্দোলনো হৈছে।
প্ৰধানমন্ত্ৰী নেত্যানাহুই আনকি বিগত বৰ্ষৰ ডিচেম্বৰ মাহত সংসদত দাখিল কৰিবলগীয়া বাজেটো দাখিল কৰিবলৈ সমৰ্থ নহ’ল।
সেইবাবেই বিৰোধী দলৰে কোনোৱা সমৰ্থকে বিশাল ওজনৰ উলংগ প্ৰতিমূৰ্তি স্থাপন কৰি থৈ যোৱা বুলি সন্দেহ কৰা হৈছে।
আৰক্ষীয়ে ঘটনা সন্দৰ্ভত তদন্ত আৰম্ভ কৰিছে যদিও এতিয়ালৈকে কাকো গ্ৰেপ্তাৰ কৰিবলৈ সক্ষম হোৱা নাই।