উত্তৰ প্ৰদেশৰ কানপুৰৰ এখন চিকিৎসালয়ত এগৰাকী নাৰ্ছক ধৰ্ষণ কৰাৰ অভিযোগ উত্থাপন হৈছে চিকিৎসালয়খনৰে সঞ্চালকৰ বিৰুদ্ধে। ২২ বছৰীয়া যুৱতীগৰাকীয়ে দুমাহমান পূৰ্বে কামত যোগদান কৰিছিল।
অভিযোগ অনুসৰি যোৱা দেওবাৰে সন্ধিয়া কিশোৰীগৰাকীক চিকিৎসালয়ত আটক কৰি নিৰ্যাতন চলাইছিল। সেই ঘটনাত সোমবাৰে গ্ৰেপ্তাৰ কৰা হৈছে অভিযুক্তক। অৱশ্যে অভিযুক্তৰ নাম আৰু পৰিচয় এতিয়াও আৰক্ষীয়ে প্ৰকাশ কৰা নাই।
দেওবাৰে নিশা সংঘটিত হোৱা এই ঘটনাৰ পিছতে কিশোৰীগৰাকীয়ে আৰক্ষীক এজাহাৰ দাখিল কৰে। ভুক্তভোগীৰ অভিযোগৰ পিছতে আৰক্ষীয়ে প্ৰাথমিক তদন্ত আৰম্ভ কৰে। পিছত তদন্ত অব্যাহত থকাৰ মাজতে চিকিৎসালয়খনৰ অভিযুক্ত সঞ্চালকক গ্ৰেপ্তাৰ কৰা হয়।
লগতে পঢ়কঃ বৰপেটাৰোডৰ শিমলাগুৰিত ভয়ংকৰ পথ দুৰ্ঘটনাত থিতাতে নিহত পিতা-পুত্ৰ
কল্যাণপুৰৰ সহকাৰী আৰক্ষী আয়ুক্ত অভিষেক পাণ্ডেই জনোৱা মতে, মহিলাগৰাকীয়ে যোৱা দুমাহ ধৰি তাত নাৰ্ছ হিচাপে কাম কৰি আছিল। দেওবাৰে চিকিৎসালয়ত এক নৈশ আহাৰৰ আয়োজন কৰা হৈছিল। তালৈও নিমন্ত্ৰণ কৰা হৈছিল ভুক্তভোগীক।
তেওঁ অভিযোগ কৰে যে নৈশ আহাৰ খোৱাৰ পিছত সঞ্চালকে তেওঁক কিছু কামৰ বাবে নিশা চিকিৎসালয়ত থাকিবলৈ কয়। ইয়াৰ পিছত নিশা গভীৰ হোৱাৰ সময়ত সঞ্চালকগৰাকীয়ে যুৱতীগৰাকীক নিজৰ কোঠালৈ মাতি পঠায়। যুৱতীগৰাকীয়ে কোঠাটোত প্ৰৱেশ কৰাৰ লগে লগে অভিযুক্তই বলপূৰ্বকভাৱে তেওঁক ভিতৰলৈ টানি নি দৰ্জা বন্ধ কৰি দিয়ে।
নাম প্ৰকাশত অনিচ্ছুক এজন আৰক্ষী বিষয়াই সংবাদ সংস্থাক জানিবলৈ দিয়া মতে চিকিৎসালয়ৰ সঞ্চালকে নাৰ্ছগৰাকীক কোঠাৰ ভিতৰতে আবদ্ধ কৰি ৰাখিছিল। সেই নিশা তেওঁ নাৰ্ছগৰাকীক ধৰ্ষণ কৰাৰো অভিযোগ উত্থাপন হৈছে। আনকি বিষয়টো পোহৰলৈ আহিলে ভুক্তভোগীক হত্যা কৰাৰ ভাবুকিও দিছিল অভিযুক্তই।
লগতে পঢ়কঃ আজি আমেৰিকা যুক্তৰাষ্ট্ৰত ৰাষ্ট্ৰপতি নিৰ্বাচন, কোন যাব হোৱাইট হাউছলৈ; দৃষ্টি নিৱদ্ধ সমগ্ৰ বিশ্বৰ
ইতিমধ্যে দেওবাৰে নিশা সংঘটিত হোৱা এই ঘটনাত অভিযুক্তক গ্ৰেপ্তাৰ কৰিছে আৰক্ষীয়ে। অৱশ্যে তদন্তৰ স্বাৰ্থত তেওঁৰ নাম আৰু পৰিচয় প্ৰকাশ কৰা হোৱা নাই। অভিযোগ কৰা নাৰ্ছগৰাকীৰ শাৰীৰিক পৰীক্ষাৰ ব্যৱস্থাও কৰে আৰক্ষীয়ে। শাৰীৰিক পৰীক্ষাৰ অন্তত ভুক্তভোগীৰ গোপন জবানবন্দী সংগ্ৰহ কৰা হ’ব।
শেহতীয়াকৈ চিকিৎসালয়কে ধৰি বিভিন্ন কৰ্মক্ষেত্ৰত মহিলাৰ সুৰক্ষাৰ দাবী অধিক প্ৰবল হৈ পৰিছে। ইয়াৰ মাজতে কানপুৰৰ চিকিৎসালয়ৰ ভিতৰত এগৰাকী নাৰ্ছক ধৰ্ষণৰ অভিযোগ উত্থাপন হৈছে।
