ওড়িশাৰ সম্বলপুৰত এক অতি মৰ্মান্তিক ঘটনা সংঘটিত হৈছে। পশ্চিম বংগৰ পৰা কাম কৰিবলৈ যোৱা এজন যুৱকক অবৈধ বাংলাদেশী বুলি সন্দেহ কৰি একাংশ লোকে প্ৰহাৰ কৰি হত্যা কৰে। বুধবাৰে সন্ধিয়া ঘটা এই ঘটনাই সমগ্ৰ দেশতে তীব্ৰ চাঞ্চল্যৰ সৃষ্টি কৰিছে। জানিব পৰা মতে নিহত যুৱকজনৰ নাম জুৱেল শ্বেখ আৰু তেওঁ পশ্চিম বংগৰ মুৰ্ছিদাবাদ জিলাৰ বাসিন্দা আছিল।
ঘটনাৰ অনুসৰি জুৱেল শ্বেখে তেওঁৰ তিনিজন সংগীৰ সৈতে এখন চাহ দোকানত ৰৈ থকাৰ সময়তে একাংশ লোকে তেওঁলোকক ঘেৰি ধৰে। লোকসকলে তেওঁলোকক বাংলাদেশী অনুপ্ৰৱেশকাৰী বুলি অভিযোগ উত্থাপন কৰে আৰু তেওঁলোকৰ পৰিচয় পত্ৰ দেখুৱাবলৈ বাধ্য কৰে। শ্ৰমিককেইজনে নিজৰ বৈধ ভাৰতীয় নথি-পত্ৰ দেখুওৱাৰ পিছতো একাংশ উন্মত্ত লোকে তেওঁলোকক আক্ৰমণ কৰে। জুৱেলক ইমানেই নিৰ্মমভাৱে প্ৰহাৰ কৰা হয় যে চিকিৎসালয়লৈ নিয়াৰ পথতে তেওঁৰ মৃত্যু হয়। অৱশ্যে তেওঁৰ আন তিনিজন সংগীয়ে কোনোমতে তাৰ পৰা পলায়ন কৰি প্ৰাণ ৰক্ষা কৰে।
এই সমগ্ৰ ঘটনা সন্দৰ্ভত আৰক্ষীয়ে ইতিমধ্যে তদন্ত আৰম্ভ কৰিছে। আৰক্ষী মহাপৰিদৰ্শক হিমাংশু লালে জনোৱা মতে ই কোনো পৰিকল্পিত আক্ৰমণ নাছিল বৰঞ্চ হঠাৎ সৃষ্টি হোৱা এক উত্তেজনাৰ ফলতহে এই ঘটনা সংঘটিত হৈছে। আৰক্ষীয়ে এই হত্যাকাণ্ডৰ সৈতে জড়িত থকাৰ অভিযোগত এতিয়ালৈকে ৬ জন লোকক গ্ৰেপ্তাৰ কৰিছে। স্থানীয় একাংশ সূত্ৰৰ মতে বিড়ী চুৰিৰ অভিযোগক কেন্দ্ৰ কৰিও কাজিয়াৰ সূত্ৰপাত হৈছিল বুলি জানিব পৰা গৈছে। কিন্তু আক্ৰমণকাৰীয়ে কিয় শ্ৰমিককেইজনৰ পৰিচয় পত্ৰ পৰীক্ষা কৰিব বিচাৰিছিল সেইটো এতিয়াও স্পষ্ট হোৱা নাই।
ইফালে এই ঘটনাক কেন্দ্ৰ কৰি ৰাজনৈতিক প্ৰতিক্ৰিয়াও আৰম্ভ হৈছে। পশ্চিম বংগৰ শাসকীয় দল তৃণমূল কংগ্ৰেছে ইয়াৰ বাবে বিজেপিৰ বঙালী বিৰোধী প্ৰচাৰক জগৰীয়া কৰিছে। তেওঁলোকে অভিযোগ কৰিছে যে বাংলা ভাষী লোকক উদ্দেশ্য কৰি দিয়া ঘৃণামূলক ভাষণে এনে পৰিৱেশৰ সৃষ্টি কৰিছে। আনহাতে যোৱা সপ্তাহত কেৰালাতো অনুৰূপ ধৰণৰ আন এটা ঘটনা সংঘটিত হৈছিল য’ত ছত্তীশগড়ৰ এজন শ্ৰমিকক বাংলাদেশী বুলি সন্দেহ কৰি হত্যা কৰা হৈছিল। দেশৰ বিভিন্ন প্ৰান্তত বৃদ্ধি পোৱা এনে ধৰণৰ ঘটনাই এতিয়া সাধাৰণ শ্ৰমিকসকলৰ নিৰাপত্তাক লৈ ডাঙৰ প্ৰশ্নচিহ্ন থিয় কৰাইছে।
