ওড়িশাৰ সুন্দৰগড় জিলাৰ ঝাৰখণ্ড সীমান্তৰ সমীপৰ ৰেলপথত সংঘটিত হৈছে এক আই ই ডি (ইম্প্ৰ’ভাইজড এক্সপ্ল’চিভ ডিভাইচ) বিস্ফোৰণ। এই বিস্ফোৰণত এজন ৰে’লৱে শ্ৰমিকৰ মৃত্যু হোৱাৰ লগতে আন এজন গুৰুতৰভাৱে আহত হৈছে বুলি জানিব পৰা গৈছে। নিহত শ্ৰমিকজনৰ নাম আতুৱা ওৰাম (৩৭), তেওঁ দক্ষিণ-পূব ৰে’লৱেৰ এজন ‘কী-মেন’ আছিল। ইফালে আহত শ্ৰমিক বুধুৱা মুণ্ডা (৩৫)ক ৰাউৰকেলাৰ এখন ব্যক্তিগত চিকিৎসালয়ত ভৰ্তি কৰা হৈছে। বিস্ফোৰণস্থলীৰ সমীপত মাওবাদীৰ পোষ্টাৰ উদ্ধাৰ হোৱাৰ প্ৰতি লক্ষ্য ৰাখি, আৰক্ষীয়ে এই বিস্ফোৰণৰ পিছত মাওবাদীৰ জড়িত থকাৰ সন্দেহ কৰিছে।
প্ৰাপ্ত খবৰ অনুসৰি ঘটনাটো সংঘটিত হৈছে দেওবাৰে পুৱা প্ৰায় ১০ বজাত, বিমলগড় শাখাৰ অন্তৰ্গত, ৰাউৰকেলাৰ পৰা ১১০ কিলোমিটাৰ দূৰৈৰ ৰেঞ্জাডা ষ্টেচনৰ সমীপৰ কৰমপদা-ৰেঞ্জাডা সংযোগী ৰে’লপথত। এইটো এটা লুপ লাইন হোৱাৰ বাবে যাত্ৰীবাহী ৰে’লৰ চলাচলত কোনো ব্যাঘাত ঘটা নাই, যদিও ৰ”লপথৰ এটা কংক্ৰিট স্লিপাৰৰ সামান্য ক্ষতি হৈছে বুলি সদৰী কৰিছে।
উল্লেখ্য যে বিস্ফোৰণস্থলী ঝাৰখণ্ডৰ পশ্চিম সিংভূম জিলাৰ মাওবাদীৰ দুৰ্গ হিচাপে পৰিচিত সাৰন্দা বনাঞ্চলৰ অন্তৰ্গত। আৰু এই বিস্ফোৰণ সংঘটিত হৈছে নিষিদ্ধ মাওবাদী সংগঠনৰ ২৮ জুলাইৰ পৰা ৩ আগষ্টলৈ পালন কৰা ‘শ্বহীদ সপ্তাহ’ৰ অন্তিম দিনটোতে।
এই ঘটনাৰ পূৰ্বে ২৭ মে’ত সাৰন্দাৰ বাঁকো বনাঞ্চলত মাওবাদীয়ে বিস্ফোৰকভৰ্তি এখন ট্ৰাক লুণ্ঠন কৰিছিল, আৰু ১৪ জুনত চিআৰপিএফৰ এজন সহকাৰী উপ-পৰিদৰ্শকৰ মৃত্যু হৈছিল এটা আই ই ডি বিস্ফোৰণত। শেহতীয়াকৈ ঝাৰখণ্ড আৰু ওড়িশাৰ নিৰাপত্তাৰক্ষী বাহিনীয়ে সাৰন্দা বনাঞ্চলত তালাচী চলাই ৩৫ লাখ টকা নগদ ধন উদ্ধাৰ কৰিছিল।ওড়িশাৰ মুখ্যমন্ত্ৰী মোহন চৰণ মাঝিয়ে এই ঘটনাত শোক প্ৰকাশ কৰি নিহত আতুৱা ওৰামৰ পৰিয়ালৰ বাবে মুখ্যমন্ত্ৰীৰ সাহায্য পুঁজিৰ পৰা ১০ লাখ টকাৰ ক্ষতিপূৰণ ঘোষণা কৰিছে।
