ওড়িশাৰ জগৎসিংপুৰ জিলাত এক অত্যন্ত মৰ্মান্তিক আৰু জঘন্য ঘটনা সংঘটিত হৈছে। এগৰাকী ২৩ বছৰীয়া যুৱতীক একেটা দিনতে দুবাৰকৈ ধৰ্ষণ কৰাৰ পাছত চাৰি মহলীয়া অট্টালিকাৰ পৰা পেলাই হত্যা কৰা হৈছে।
আৰক্ষীয়ে জনোৱা অনুসৰি এই নিৰ্মম কাণ্ডত যুৱতীগৰাকীৰ প্ৰেমিক আৰু সহায় কৰিবলৈ অহা এগৰাকী অচিনাকি লোক জড়িত আছিল। ইতিমধ্যে আৰক্ষীয়ে দুয়োজন অভিযুক্তকে গ্ৰেপ্তাৰ কৰিছে আৰু তেওঁলোকৰ বিৰুদ্ধে অপহৰণ, ধৰ্ষণ আৰু হত্যাৰ গোচৰ ৰুজু কৰিছে।
আৰক্ষী অধীক্ষক অংকিত কুমাৰ বৰ্মাই জনোৱা মতে এই ঘটনাটো যোৱা ২২ ফেব্ৰুৱাৰীত সংঘটিত হৈছিল। যুৱতীগৰাকীয়ে তেওঁৰ প্ৰেমিকৰ সৈতে পলাই গৈ বিয়া কৰাৰ পৰিকল্পনাৰে ঘৰৰ পৰা ওলাই আহিছিল। প্ৰেমিকে তেওঁক এখন মন্দিৰলৈ মাতি নিছিল যদিও পাছত এটা নিৰ্জন ঠাইলৈ লৈ গৈ ধৰ্ষণ কৰে। ইয়াৰ পাছতে প্ৰেমিকে তেওঁক ৰাহামা নামৰ এটা বাছ আস্থানত অকলে এৰি থৈ পলাই যায়। সহায়হীন অৱস্থাত বাছ আস্থানত ৰৈ থকাৰ সময়তে ঝাৰখণ্ডৰ এজন লোকে মটৰ চাইকেলেৰে আহি তেওঁক সহায় কৰাৰ প্ৰতিশ্ৰুতি দিয়ে।
সহায় কৰাৰ চেলুৰে লোকজনে যুৱতীগৰাকীক পাৰাদীপ চহৰৰ নিজৰ ভাড়া ঘৰৰ ছাদলৈ লৈ যায় আৰু তাত পুনৰ ধৰ্ষণ কৰে। ইয়াৰ পাছতে অপৰাধটো লুকুৱাবলৈ অভিযুক্তই যুৱতীগৰাকীক অট্টালিকাৰ ছাদৰ পৰা তললৈ পেলাই দিয়ে, যাৰ ফলত তেওঁৰ মৃত্যু হয়। ২৩ ফেব্ৰুৱাৰীৰ পুৱা যুৱতীগৰাকীৰ মৃতদেহ উদ্ধাৰ কৰা হৈছিল। যুৱতীগৰাকী ঘৰলৈ ঘূৰি নহাত পৰিয়ালে আগতেই নিৰুদ্দেশ হোৱাৰ গোচৰ দিছিল যদিও পাছত ২৫ ফেব্ৰুৱাৰীত তেওঁৰ ভাতৃয়ে ধৰ্ষণ আৰু হত্যাৰ অভিযোগ উত্থাপন কৰি এজাহাৰ দাখিল কৰে।
এই ঘটনাক লৈ সমগ্ৰ ৰাজ্যখনতে তীব্ৰ প্ৰতিক্ৰিয়াৰ সৃষ্টি হৈছে। বিৰোধী দলৰ নেতা নবীন পাটনায়কে এই ঘটনাক তীব্ৰ ভাষাৰে গৰিহণা দিছে। তেওঁ সামাজিক মাধ্যমত ক্ষোভ প্ৰকাশ কৰি কয় যে ৰাজ্যখনত মহিলাৰ সুৰক্ষা এতিয়া সংকটত পৰিছে। চৰকাৰে সুৰক্ষাৰ কথা যিয়েই নকওক কিয়, বাস্তৱত অপৰাধীৰ সাহস বৃদ্ধিহে পাইছে। তেওঁ চৰকাৰক এই ক্ষেত্ৰত কঠোৰ পদক্ষেপ ল’বলৈ আৰু ভুক্তভোগী পৰিয়ালক ন্যায় প্ৰদান কৰিবলৈ দাবী জনাইছে।
