চূড়ান্ত এন আৰ চি প্ৰকাশৰ এমাহৰ ভিতৰত আৰু ২০০খন বিদেশী ন্যায়াধিকৰণ স্থাপন কৰাৰ কথা চৰকাৰে ঘোষণা কৰাৰ সময়তে ভাড়া ঘৰত বিদেশী ন্যায়াধিকৰণৰ কামকাজ চলি থকা আৰু সেই ঘৰৰ ভাড়াও দিবলৈ সক্ষম নোহোৱাৰ এটা ঘটনা পোহৰলৈ আহিছে।
২৯ মাহৰ ঘৰ ভাড়া আৰু সম পৰিমাণৰ সময়ৰ বিদ্যুৎ বিল অনাদায় হৈ থকা ঘটনাটো গোৱালপাৰা জিলাৰ মৰনৈৰ।
ভুক্তভোগী ৰত্না সেনৰ পৰিয়ালটোৱে জনোৱা মতে, বিদেশী ন্যায়াধিকৰণৰ কাম কাজ চলাবলৈ মাটিয়া চক্ৰ বিষয়াই ২০১৫ চনতে এটা ঘৰসহ এটা চৌহদ তেওঁলোকৰ পৰা ভাড়ালৈ লৈ অতিৰিক্ত বিদেশী ন্যায়াধিকৰণক কাম-কাজ কৰিবলৈ দিয়ে ৷
কিন্তু অতি পৰিতাপৰ কথা যে প্ৰশাসনে ২৯ মাহ এই ঘৰটো ভাড়াত লৈ ইয়াতে বিদেশী ন্যায়াধিকৰণৰ কাম- কাজ চলাই আছিল যদিও ভাড়াৰ নামত আজিলৈ এটা টকাও নিদিলে ঘৰটোৰ মালিকক ৷ আনকি বিদ্যুতৰ বিলো দিয়া নাছিল।
৬ টাকৈ কোঠা থকা বৃহৎ ঘৰটোৰ ভাড়াৰ বাবত মালিকে বাৰম্বাৰ নিজৰ প্ৰাপ্য বিচাৰি আছিল যদিও কোনো গুৰুত্ব দিয়া নাছিল প্ৰশাসনে ৷
আৰু আচৰিত কথাটো হ’ল- এদিন হঠাতেই অতিৰিক্ত বিদেশী ন্যায়াধীশৰ কাৰ্যালয়টো আন ঠাইলৈ স্থানান্তৰ হৈ গ’ল।
ঘৰটোৰ মালিকে যোৱা ২৯ মাহে নিজৰ প্ৰাপ্য বিচাৰি কাৰ্যালয়ে কাৰ্যালয়ে অহা-যোৱা কৰিও কোনো ফল পোৱা নাই। ঘৰ ভাড়াৰ উপৰি ২৯ মাহত বিদ্যুতৰ মাচুল ২৫ হাজাৰ টকাকৈ, সেয়াও আদায় নিদিলে প্ৰশাসনে, যাৰ বাবে বিদ্যুৎ বিভাগে বিদ্যুৎ সংযোগ বিছিন্ন কৰি দিছে।
ঘৰৰ মালিকে ঘৰৰ প্ৰাপ্য ভাড়াৰ উপৰি ২৯ মাহৰ বিদ্যুতৰ বিল আদায়ৰ বাবে উপায়ুক্তৰ কাৰ্যালয়লৈ বহুবাৰ অহা-যোৱা, আবেদন-নিবেদন কৰিও আজিলৈ এটা টকাও পাবলৈ সক্ষম নহ’ল৷
ঘোষিত বিদেশীক ন্যায় দিব খোজা বিদেশী ন্যায়াধিকৰণ আৰু গোৱালপাৰা জিলা প্ৰশাসনৰ এনে অন্যায় তথা দায়িত্বহীনতাই অঞ্চলটোৰ সচেতন মহলক ভবাই তুলিছে।
