শংকৰদেৱক উপলুঙা কৰি মন্তব্য কৰা পতঞ্জলিৰ যোগ নিৰীক্ষক সতীনাথ বাৰালৰ বিৰুদ্ধে ৰাজ্যৰ বিভিন্ন প্ৰান্তত প্ৰতিক্ৰিয়া হৈ থকাৰ মাজতে ৩০ ছেপ্তেম্বৰত পাণবজাৰ থানাত বাৰালৰ বিৰুদ্ধে এখন এজাহাৰ দাখিল কৰে ঐক্য সেনা, অসমে।
উল্লেখ্য যে, কালি পতঞ্জলিৰ উদ্যোগত দৰং জিলাৰ দুনীত যোৱা ২৪ ছেপ্তেম্বৰৰ পৰা অনুষ্ঠিত যোগ শিবিৰত এই যোগ নিৰীক্ষকজনে অসমীয়া মানুহৰ বিষয়ে আৰু অসমীয়া সমাজৰ নমন্য পুৰুষ শ্ৰীমন্ত শংকৰদেৱৰ বিষয়ে উপলুঙাসূচক মন্তব্য কৰিছিল।
২৯ ছেপ্তেম্বৰৰ সামৰণি অনুষ্ঠানত সতীনাথ বাৰালে ভাষণ প্ৰসংগত ‘শংকৰদেৱ কোনো ডাঙৰ পণ্ডিত নহয়’, ‘নামঘোষাত একো ভাল কথা নাই’ আৰু ‘নামঘৰত মিঠাতেলৰ চাকি মুৰ্খই জ্বলায়’ ইত্যাদি বহুতো বিতৰ্কিত মন্তব্য কৰে।
এনে অপমানসমূচক মন্তব্যক কেন্দ্ৰ কৰি উক্ত শিবিৰতে হুলস্থূলীয়া পৰিস্থিতিৰ সৃষ্টি হোৱাত পলায়ন কৰে ভণ্ড যোগগুৰুজনে।
আনহাতে খবৰটো প্ৰচাৰিত হোৱাত ৰাজ্যৰ চাৰিওফালে বিভিন্ন ঠাইত প্ৰতিক্ৰিয়া হোৱা দেখা গৈছে। বিভিন্ন দল-সংগঠনেও বাৰালক গ্ৰেপ্তাৰ কৰিবলৈ দাবী জনাইছে। এই মন্তব্যৰ বাবে ঐক্য সেনা অসমে গুৱাহাটীৰ পাণবজাৰ আৰক্ষী থানাত উক্ত যোগ নিৰীক্ষক বাৰালৰ বিৰুদ্ধে এখন এজাহাৰ দাখিল কৰি তেওঁক অতি শীঘ্ৰে গ্ৰেপ্তাৰ কৰাৰ দাবী কৰিছে। সংগঠনটোৰ এজাহাৰৰ ভিত্তিত পাণবজাৰ আৰক্ষীয়ে ৬৪৩/১৮ নম্বৰত এক গোচৰ ৰুজু কৰা বুলি আমাৰ জানিবলৈ দিছে।
থানাত এজাহাৰ দাখিল কৰি অহাৰ পাছত ঐক্য সেনা অসমৰ জ্যেষ্ঠ মুখপাত্ৰ কমল কুমাৰে নৰ্থ-ইষ্ট নাওৰ আগত কয়, “পতঞ্জলিৰ যোগ নিৰীক্ষকজনে জগতগুৰু শংকৰদেৱ তথা নামঘোষা বা নামঘৰক অপমান কৰা মানে সমগ্ৰ অসমীয়া জাতিটোকে অপমান কৰা। সেয়েহে অসমীয়া জাতিক অপমান কৰা কোনোধৰণৰ কাৰ্য্যক আমি সমৰ্থন নকৰো।”
উল্লেখ্য যে, আৰক্ষীয়ে যোগ নিৰীক্ষকগৰাকীৰ বিৰুদ্ধে বিহিত ব্যৱস্থা গ্ৰহণ নকৰিলে ৰাজ্যৰ চুকে-কোণে পতঞ্জলিৰ বিৰুদ্ধে ৰাইজক সজাগ কৰি তুলিব বুলি আমাৰ আগত জানিবলৈ দিয়াৰ উপৰি যোগ নিৰীক্ষক সতীনাথ বাৰালক গ্ৰেপ্তাৰ নকৰা পৰ্য্যন্ত প্ৰতিবাদ অৱ্যাহত ৰাখিব বুলিও হুংকাৰ দিয়ে।
