কোভিডৰ সংহাৰে কোঙা কৰা বিশ্বৰ অৰ্থনীতিত ভূতৰ ওপৰত দানহ পৰাদি যুদ্ধই কঢ়িয়াই আনিছে আন এক অশনি সংকেত।
ৰাছিয়াই ইউক্ৰেইনত আক্ৰমণ আৰম্ভ কৰাৰ লগে লগে বিশ্বজুৰি খাৰুৱা তেলৰ দাম অভাৱনীয় হাৰত বৃদ্ধি পোৱাৰ আশংকাই দেখা দিছে।
বৃহস্পতিবাৰে ৰাছিয়াই ইউক্ৰেইনলৈ সৈন্য পঠিওৱাৰ পিছতে, ২০১৪ চনৰ পিছত প্ৰথমবাৰৰ বাবে প্ৰতি বেৰেল তেলৰ দাম ১০০ ডলাৰকৈ বৃদ্ধি পাইছে। উল্লেখ্য যোৱা নিশাৰে পৰা ৰাছিয়াই ইউক্ৰেইনত বেলিষ্টিক মিছাইলেৰে আক্ৰমণ আৰম্ভ কৰিছে।
ইউক্ৰেইনৰ বৈদেশিক মন্ত্ৰী ডিমিট্ৰো কুলেবাই এক টুইটযোগে ইউক্ৰেইন আক্ৰমণৰ কথা স্বীকাৰ কৰাৰ লগতে এই আক্ৰমণ আৰু অধিক ভয়াৱহ হ’ব বুলি আশংকা প্ৰকাশ কৰিছে।
এই যুদ্ধৰ ফলত বিশ্বৰ তেলৰ বজাৰ খনত ব্যাপক প্ৰভাৱ পৰিছে। কিয়নো ইউক্ৰেইন হৈছে বিশ্বৰ তৈল আৰু গেছৰ ভাণ্ডাৰত চহকী দেশ সমূহৰ মাজৰে এখন অন্যতম দেশ।
এছিয়াৰ লগতে ইউৰোপৰ বহু কেইখন দেশলৈ ইউক্ৰেইনৰ পৰাই তেল ৰপ্তানি কৰা হয়। ৰাছিয়াই যোৱা নিশাৰে পৰা ইউক্ৰেইনৰ তৈল আৰু গেছৰ ভাণ্ডাৰ থকা সীমান্তৱৰ্তী অঞ্চলসমূহতে আক্ৰমণ তীব্ৰতৰ কৰি তুলিছে।
ফলত বন্ধ হৈ পৰিছে তেলৰ খাদ সমূহ। এনে পৰিস্থিতিত আন্তঃৰাষ্ট্ৰীয় বজাৰত তেলৰ দাম হঠাতে বেৰেলে প্ৰতি ১০০ ডলাৰকৈ বৃদ্ধি পাইছে।
উল্লেখ্য ৰাছিয়া হৈছে বিশ্বৰ দ্বিতীয় সৰ্ববৃহৎ তেল উৎপাদক দেশ। দেশ খনে মুখ্যতঃ ইউৰোপীয় শোধনাগাৰসমূহক অশোধিত তেল বিক্ৰী কৰে। ৰাছিয়াই ইউৰোপৰ দেশসমূহলৈ প্ৰায় ৩৫ শতাংশ প্ৰাকৃতিক গেছ যোগান ধৰি আহিছে।
ৰাছিয়াৰ বিৰুদ্ধে বিশ্বৰ বহু কেইখন দেশে অৰ্থনৈতিক নিষেধাজ্ঞা জাৰি কৰাৰ পিছত বিশ্বৰ বহু ঠাইত খাৰুৱা তেলৰ নাটনি হোৱাটো নিশ্চিত হৈ পৰিছে। ইয়াৰ প্ৰভাৱ ভাৰততো নিশ্চিত ভাবে পৰিব বুলি ধাৰণা কৰা হৈছে।
