অইল ইণ্ডিয়া লিমিটেডে বানপানীৰ বাবে তিনিচুকীয়াৰ বাঘজানত গেছখাদৰ জুই নুমুৱা কাম বন্ধ কৰিছে।
উজনি অসমত যোৱা কেইবাদিন ধৰি নেৰানেপেৰা বৰষুণ হৈ আছে আৰু বাঘজানৰ অগ্নিকাণ্ডৰ স্থান বানে বুৰাই পেলাইছে।
অঞ্চলটোৰ নৈসমূহৰ জলস্তৰ ধাৰাবাহিকভাৱে বাঢ়িয়ে আছে।
অগ্নিকাণ্ডৰ স্থানৰ পৰা ১০ কি. মি. দূৰত ডুমডুমা-বাঘজান পথৰ এখন আৰ চি চি দলং পানীৰ সোঁতত ভাগি গৈছে।
“ডাঙৰি নৈৰ পানী ওফন্দি উঠিছে। (অগ্নিকাণ্ডৰ) স্থানলৈ অহা সকলো সংযোগী পথ বানপানীয়ে বুৰাই পেলাইছে,” অইলৰ জ্যেষ্ঠ পৰিচালক (ক’ৰ্প’ৰেট কমিউনিকেচন) জয়ন্ত বৰমুদৈয়ে কয়।
তেওঁ লগতে জনাই যে মাগুৰি বিলৰ ওপৰৰ দলংখনৰ পৰা গেছখাদটোলৈকে পথচোৱা বানে বেয়াকৈ ক্ষতিগ্ৰস্ত কৰিছে।
জিলা প্ৰশাসনে পথচোৱাত সকলো ধৰণৰ যান-বাহনৰ চলাচল বন্ধ কৰি দিছে।
বানপানীয়ে অগ্নিকাণ্ডস্থলীৰ বৃহৎ অংশ বুৰাই পেলোৱা বাবে সেই স্থানক অসুৰক্ষিত বুলি বিবেচনা কৰি দিনটোৰ বাবে সকলো কাম বন্ধ কৰি দিয়া হৈছে।
গড়কাপ্তানী আৰু অইলৰ অভিযন্তাসকলে যুটীয়াভাৱে পথচোৱা পৰিদৰ্শন কৰি আছে।
অৱশ্যে যিকোনো জৰুৰী পৰিস্থিতিৰ মোকাবিলা কৰাৰ বাবে অগ্নিনিৰ্বাপণ বাহিনীৰ লোকসকলক গুৰুত্বপূৰ্ণ স্থানসমূহত ৰখা হৈছে।
অগ্নিকাণ্ডস্থলীত কাম বন্ধ হ’লেও অইলৰ ৱৰ্কশ্বপত সকলো কাম অব্যাহত আছে।
বানৰ প্ৰকোপ কমিলেই অগ্নিকাণ্ডথলীলৈ নিব পৰাকৈ বিভিন্ন সা-সৰঞ্জামসমূহ সাজু কৰি তোলা হৈছে।
