অসমৰ ৰাজনৈতিক প্ৰেক্ষাপটত বৰ্তমান নিউ গুৱাহাটী সমষ্টিটোক লৈ শাসনাধিষ্ঠিত বিজেপি দলৰ ভিতৰচ’ৰাত এক তীব্ৰ প্ৰতিযোগিতাৰ সৃষ্টি হোৱা দেখা গৈছে। সমষ্টি পুনৰ নিৰ্ধাৰণ প্ৰক্ৰিয়াৰ পাছত পূৰ্বৰ ‘পূব গুৱাহাটী’ সমষ্টিটোৱেই এতিয়া ‘নিউ গুৱাহাটী’ হিচাপে পৰিচিত হৈছে। এই নতুনকৈ গঠিত সমষ্টিটোৰ পৰা বিজেপিৰ টিকট লাভৰ বাবে দলটোৰ কেইবাজনো হেভীৱেট নেতাৰ নাম চৰ্চালৈ আহিছে।
প্ৰাৰ্থিত্বৰ এই দৌৰত গুৱাহাটী পৌৰ নিগমৰ বৰ্তমানৰ মেয়ৰ মৃগেন শৰণীয়াৰ লগতে প্ৰাক্তন মুখ্যমন্ত্ৰী সৰ্বানন্দ সোণোৱালৰ ঘনিষ্ঠ তথা জ্যেষ্ঠ অধিবক্তা শান্তনু ভৰালীৰ নাম বিশেষভাৱে চৰ্চিত হৈছে। ইয়াৰ উপৰি ৰূপম গোস্বামী, প্ৰণৱজ্যোতি লহকৰ, অপৰাজিতা ভূঞা আৰু শশাংক ডেকাৰ দৰে নেতাসকলেও সমষ্টিটোৰ বাবে দলীয় টিকটৰ আশা কৰিছে।
অৱশ্যে, এই নবাগত আৰু জ্যেষ্ঠ প্ৰাৰ্থিত্বপ্ৰত্যাশীসকলৰ বাবে আটাইতকৈ ডাঙৰ প্ৰত্যাহ্বান হৈ থিয় দিছে বৰ্তমানৰ বিধায়ক তথা বিজেপিৰ প্ৰাক্তন ৰাজ্যিক সভাপতি সিদ্ধাৰ্থ ভট্টাচাৰ্য। দীৰ্ঘদিন ধৰি সমষ্টিটোৰ নেতৃত্ব দি অহা ভট্টাচাৰ্যই এইবাৰো নিজৰ আসনখন এৰি দিবলৈ সন্মত হোৱা নাই, যাৰ ফলত আন প্ৰাৰ্থীসকলৰ বাবে পথটো কণ্টকাকীর্ণ হৈ পৰিছে।কিন্তু ৰাজনৈতিক পৰ্যবেক্ষকসকলৰ মতে, পৰিস্থিতি আগৰ দৰে সহজ হৈ থকা নাই। দহ বছৰ ধৰি বিধায়ক হিচাপে থকা সিদ্ধাৰ্থ ভট্টাচাৰ্যৰ জনপ্ৰিয়তাক লৈ সমষ্টিবাসীৰ মাজত কিছু অসন্তুষ্টিৰ গুঞ্জন শুনা গৈছে। তদুপৰি, সমষ্টি পুনৰ নিৰ্ধাৰণৰ ফলত ভৌগোলিক সীমা সলনি হৈছে আৰু পূৰ্বৰ পূব গুৱাহাটীৰ বহু গুৰুত্বপূৰ্ণ এলেকা বৰ্তমানৰ নিউ গুৱাহাটীৰ পৰা কৰ্তন কৰা হৈছে। এনে এক জটিল সমীকৰণৰ মাজত বিজেপিৰ হাইমণ্ডিঙে এজন নতুন মুখক সুযোগ দিব নে অভিজ্ঞ ভট্টাচাৰ্যৰ ওপৰতে পুনৰ আস্থা প্ৰদৰ্শন কৰিব, সেয়া সময়হে ক’ব।
