মেৰামতিৰ বাবে যোৱা তিনিমাহে বন্ধ হৈ থকা শৰাইঘাটৰ পুৰণি দলঙেৰে আজিৰ পৰা পুনৰ যান-বাহন চলাচল কৰিব। আজি বিয়লি ৩:৩০ বজাত উত্তৰ-পূব ৰে’লৱেৰ সাধাৰণ সঞ্চালকে আনুষ্ঠানিকভাৱে দলঙখন মুকলি কৰিব। উত্তৰ-পূব সীমান্ত ৰে’লৱেৰ জনসম্পৰ্কৰক্ষী বিষয়া নৃপেন ভট্টাচাৰ্য্যই এই কথা সংবাদমাধ্যমৰ আগত জানিবলৈ দিয়ে।
যোৱা ২৩ মাৰ্চৰ পৰা মেৰামতিৰ বাবে দলঙখনত যান বাহনৰ চলাচল সাময়িকভাৱে বন্ধ ৰখা হৈছিল, যাৰ ফলত জালুকবাৰীৰ পৰা দলঙৰ সিটো মূৰলৈকে প্ৰতিদিনেই সৃষ্টি হৈছিল তীব্ৰ যান-জঁটৰ। আজিৰ পৰা দলঙখন মুকলি হ’লে যাত্ৰীসকলে যান-জঁটৰ সমস্যাৰ পৰা কিছু পৰিমাণে সকাহ লাভ কৰিব।
উল্লেখযোগ্য যে, ২৯ এপ্ৰিলত দলংখনৰ মেৰামতিৰ কাম পৰিদৰ্শন কৰিবলৈ যোৱা মুখ্য মন্ত্ৰী সৰ্বানন্দ সোণোৱালে মেৰামতিৰ কাম লেহেমিয়া দেখি বিভাগীয় অভিযন্তা তথা বিষয়া সকলক ২০ জুনৰ ভিতৰত কাম সম্পূৰ্ণ কৰিবলৈ কঠোৰ নিৰ্দেশ দিছিল।
ভট্টাচাৰ্য্যই জানিবলৈ দিয়া মতে দলং মেৰামতিৰ কামত দৈনিক ৫০০ জন শ্ৰমিক নিয়োজিত হৈছিল তথা ৫৪খন শ্লেব নতুনকৈ নিৰ্মাণ কৰা হৈছে। তদুপৰি নিৰ্মাণকাৰ্যত ৫০০ টনৰো অধিক ষ্টীল প্লেট আৰু ৰিনফৰ্চমেণ্ট ৰ’ড ব্যৱহৃত হৈছিল বুলিও তেওঁ জনায়।
