জম্মু-কাশ্মীৰৰ মুখ্যমন্ত্ৰী ওমৰ আব্দুল্লাক লৈ যোৱা দিল্লী অভিমুখী ইণ্ডিগো বিমানখন শনিবাৰে নিশা জয়পুৰলৈ ডাইভাৰ্ট কৰা হয়। ইয়াৰ পিছতে মুখ্যমন্ত্ৰী ওমৰে দিল্লী বিমানবন্দৰত ‘পৰিচালনা অপব্যৱস্থাপনা’ক তীব্ৰ সমালোচনা কৰে।
এক্সত গভীৰ নিশাৰ এক পোষ্টত মুখ্যমন্ত্ৰী আব্দুল্লাই এই ঘটনাক লৈ হতাশা প্ৰকাশ কৰে। অৱশ্যে ওমৰ আব্দুল্লাক কঢ়িয়াই অনা ইণ্ডিগো বিমানখনে পুৱতি নিশা ২ বজাত জয়পুৰৰ পৰা উৰা মাৰি দিল্লীত অৱতৰণ কৰে।
কিন্তু ইয়াৰ আগতে তেওঁ লিখিছিল যে দিল্লী বিমানবন্দৰত বহুত লেতেৰা আছিল। জম্মু এৰি যোৱাৰ ৩ ঘণ্টাৰ পিছত আমাক জয়পুৰলৈ ডাইভাৰ্ট কৰা হ’ল আৰু সেয়ে মই ১ বজাত বিমানৰ চিৰিত থিয় হৈ অলপ বিশুদ্ধ বতাহ লৈ আছো। ইয়াৰ পৰা আমি কিমান সময়ত যাম মই নাজানো।
ওমৰ আব্দুল্লাই বিশুদ্ধ বতাহৰ বাবে বিমানখনৰ পৰা নামি বিমানখনৰ চিৰিত থিয় হৈ চেলফিও শ্বেয়াৰ কৰে। মাজনিশাৰ পিছতো জয়পুৰত বিমানখনত আবদ্ধ হৈ থাকে মুখ্যমন্ত্ৰী আব্দুল্লাকে ধৰি বিমানখনৰ যাত্ৰীসকল। এই সন্দৰ্ভত ইণ্ডিগোৱে এতিয়ালৈকে কোনো আনুষ্ঠানিক বিবৃতি প্ৰকাশ কৰা নাই।
ইয়াৰ পূৰ্বে জম্মু বিমানবন্দৰতো বিশৃংখলতাৰ সাক্ষী হৈছিল য’ত শতাধিক যাত্ৰীয়ে বিমান পলম আৰু বাতিলৰ বাবে অসুবিধাৰ অভিযোগ উত্থাপন কৰিছিল। শ্ৰীনগৰৰ বেয়া বতৰৰ বাবে বিমানৰ কাম-কাজ ব্যাহত হৈ পৰে, যাৰ ফলত বহু সংযোগী বিমানৰ ওপৰতো প্ৰভাৱ পৰে।
শুকুৰবাৰে সন্ধিয়া এক্সত এটা পোষ্টত ইণ্ডিগ’ই ট্ৰেভেল এডভাইজাৰী জাৰি কৰে। বিমান সংস্থাটোৱে নিজৰ পৰামৰ্শত প্ৰকাশ কৰিছে যে শ্ৰীনগৰৰ বতৰৰ পৰিস্থিতিয়ে বিমান চলাচলত প্ৰভাৱ পেলাইছে। আমি বুজি পাওঁ যে ইয়াৰ ফলত অসুবিধাৰ সৃষ্টি হ’ব পাৰে আৰু আমি আপোনাৰ ধৈৰ্য্যৰ শলাগ লৈছো। অনুগ্ৰহ কৰি আপোনাৰ বিমানৰ অৱস্থাৰ বিষয়ে ৰিয়েল টাইমত আপডেট হৈ থাকক।
