কাশ্মীৰক বিশেষ অধিকাৰ দিয়া সংবিধানৰ ৩৫-এ অনুচ্ছেদ (আৰ্টিকল)ৰ হৰণ-ভগন কৰাৰ আগত অৰুণাচল প্ৰদেশত যোৱা দুই-তিনি দিনত দেখা পৰিস্থিতিৰ পৰা শিক্ষা ল’বলৈ কেন্দ্ৰক আহ্বান জনালে ওমৰ আব্দুল্লাই।
জম্মু আৰু কাশ্মীৰৰ প্ৰাক্তন মুখ্য মন্ত্ৰীজনে অৰুণাচলতকৈ ভয়ংকৰ পৰিস্থিতিৰ সম্ভাৱনা ব্যক্ত কৰি কয়, ইয়াক দেশৰ বাবে ভাবুকি বুলি ধৰিব নালাগে, কিন্তু ৩৫-এ অনুচ্ছেদটোত “হস্তক্ষেপ” কৰা হ’ব পাৰে বুলি যি জনৰৱ, তাৰ পৰিপ্ৰেক্ষিতত সৃষ্টি হোৱা চেপা উত্তেজনালৈ লক্ষ্য কৰি এই শংকা দেখা গৈছে।
উল্লেখযোগ্য যে ৩৫-এ অনুচ্ছেদটো বাতিল কৰিব লাগে বুলি উচ্চতম ন্যায়ালয়ত দিয়া এখন আৱেদনৰ শুনানি দুই-এদিনতে হোৱাৰ কথা। কেন্দ্ৰীয় চৰকাৰে এই আৱেদনৰ প্ৰতি সমৰ্থন জনোৱা বুলি খবৰ ওলাই আছে।
৩৫-এ অনুচ্ছেদটোৱে জম্মু আৰু কাশ্মীৰক ৰাজ্যখনৰ স্থায়ী বাসিন্দা নিজাববীয়াকৈ নিৰ্ণয় কৰিবলৈ অধিকাৰ দিছে। ১৯৫৪ চনত সংবিধানত অন্তৰ্ভুক্ত অনুচ্ছেদটোৱে জম্মু আৰু কাশ্মীৰৰ লোকক সামাজিক, সাংস্কৃতিক আদি দিশত সুৰক্ষা দি আহিছে। ৰাজ্যখনৰ বাহিৰৰ লোকে তাত স্থায়ী বাসিন্দাৰ প্ৰমাণপত্ৰ, চাকৰি-বাকৰি আদি পোৱাত এই অনুচ্ছেদটোৱে বাধা দি আহিছে।
যোৱা দুদিনত অৰুণাচলত অৰুণাচল প্ৰদেশ সৃষ্টি হোৱাৰ পূৰ্বৰ পৰাই তাত বাস কৰি থকা ৬টা অনা-অৰুণাচলী জনগোষ্ঠীক স্থায়ী বাসিন্দাৰ প্ৰমাণ পত্ৰ দিয়াৰ বাবে চৰকাৰে লোৱা সিদ্ধান্তৰ ব্যাপক হিংসাত্মক প্ৰতিবাদ হৈছিল। উপ-মুখ্য মন্ত্ৰী, সচিবালয়, উপায়ুক্তৰ কাৰ্য্যালয়, থানা আদিত আক্ৰমণ, অগ্নিসংযোগৰ দৰে অভূতপূৰ্ব হিংসাই ৰাজ্যখনত অগ্নিগৰ্ভ পৰিস্থিতিৰ সৃষ্টি কৰিছিল। এই প্ৰচণ্ড হিংসাৰ দাবানল দেখি থৰকাছুটি হেৰুওৱা চৰকাৰে লগে লগে সিদ্ধান্ত বাতিৰ কৰা বুলি ঘোষণা কৰে।
“মই কেন্দ্ৰক অৰুণাচলৰ পৰিস্থিতিলৈ মন কৰিবলৈ সকীয়াই দিব বিচাৰো। তাত কোনো সন্ত্ৰাসবাদ বা কোনো শিলগুটি দলিওৱা মানুহ নাই। কিন্তু পি আৰ চি বিষয়টোৱে তাত জুই জ্বলালে”, ৰাজ্যখনৰ প্ৰভাৱশালী ৰাজনীতিক ওমৰ আব্দুল্লাই কয়।
“কেন্দ্ৰ আৰু ৰাজ্যপালে এই সময়ত এটাই দায়িত্ব পালন কৰিব পাৰে, সেয়া হ’ল নিৰ্বাচন পতা। নতুনকৈ নিৰ্বাচিত চৰকাৰখনে চাব কেনেকৈ অনুচ্ছেদ ৩৫-এ-ক সুৰক্ষা দিব লাগে”, বৰ্তমান ৰাষ্ট্ৰপতি শাসন চলি থকা ৰাজ্যখনত সোনকালে নিৰ্বাচন দাবী কৰি প্ৰাক্তন মুখ্য মন্ত্ৰীজনে কয়।