কংগ্ৰেছ আমোলৰ কুখ্যাত এ পি এছ চিৰ কেলেংকাৰিৰ দৰেই একেই কায়দাৰে সংঘটিত কৰা হৈছে বিজেপি চৰকাৰৰ দিনৰ বৃহত্তম নিযুক্তি কেলেংকাৰি পঞ্চায়ত আৰু গ্ৰামোন্নয়ন বিভাগৰ নিযুক্তি কেলেংকাৰি। আজি কৃষক মুক্তিয়ে সংবাদমেল যোগে উদঙাই দিয়া তথ্যত এই কথা পোহৰলৈ আহিছে।
২০ মে’ত অত্যন্ত খেলিমেলিৰ মাজেৰে পতা পৰীক্ষাটোৰ ফলাফল দিয়াৰ ঠিক আগে আগে ৩, ৪ আৰু ৫ মাৰ্চত বদলি কৰা হৈছিল পৰীক্ষাৰ্থীয়ে উত্তৰ লিখা অ’ এম আৰ (OMR) ছীট। কৃষক মুক্তিৰ নেতা অখিল গগৈয়ে সংবাদমেলত তথ্য দি আনিছে এই অভিযোগ। নিজৰ দাবীৰ সত্যতাৰ প্ৰমাণস্বৰূপে আজি কৃষক মুক্তিৰ নেতাজনে সংবাদমেলত পৰীক্ষাৰ অ’ এম আৰ (OMR) ছীট প্ৰদৰ্শন কৰে।
“কেলেংকাৰি ঢাকিবৰ বাবেহে চৰকাৰে তদন্ত ঘোষণা কৰিছিল। মানুহৰ মনৰ পৰা সন্দেহ আঁতৰাবলৈহে তদন্তৰ ঘোষণা। মুখ্য মন্ত্ৰীয়ে কৈছিল নিযুক্তিত কেলেংকাৰি নহ’ব। সোণোৱাল চৰকাৰে কয় দুৰ্নীতিৰ বিৰুদ্ধে শূন্য সহনশীল নীতি, কিন্তু এতিয়া ভয়াৱহ দুৰ্নীতি হৈছে”, বৃহত্তম নিযুক্তি কেলেংকাৰিটোৰ বাবে সোণোৱাল চৰকাৰক তীব্ৰ আক্ৰমণ গগৈৰ।
কংগ্ৰেছৰ আমোলৰ এ পি এছ চি কেংলেংকাৰিকো পোহৰলৈ অনা গগৈয়ে বিজেপি চৰকাৰখনৰ এই কেলেংকাৰিটোত ৩গৰাকী বিয়াগোম ৰাজনৈতিক নেতা জড়িত আছে বুলি দাবী কৰে। যুটীয়া সঞ্চালক এছ কে লস্কৰো জড়িত আছে বুলি কয়।
আনহাতে তদন্তৰ দায়িত্বত থকা জিষ্ণু বৰুৱাক “দুৰ্বল মানুহ” আখ্যা দি কয়, “দুৰ্বল মানুহ হোৱা বাবে তদন্তৰ দায়িত্ব দিছে জিষ্ণু বৰুৱাক, তদন্তৰ পৰা কোনো ফলাফল নোলায়।”
উল্লেখযোগ্য যে চৰকাৰৰ পঞ্চায়ত আৰু গ্ৰামোন্নয়ন বিভাগে ৯৪৫টা পদৰ বিপৰীতে পৰীক্ষা পাতিছিল। কিন্তু মন্ত্ৰী নৱ দলেৰ বিভাগটোৱে ১৪খন জিলাত পতা পৰীক্ষাটোত প্ৰশ্নকাকত ফাদিল, পৰীক্ষা হলত ম’বাইলৰ ব্যৱহাৰকে ধৰি বিভিন্ন অনিয়ম হোৱা বুলি অভিযোগ উঠিছিল। পৰীক্ষাত প্ৰায় ১ লাখ ৮০ হাজাৰ প্ৰাৰ্থীয়ে পৰীক্ষাত অৱতীৰ্ণ হৈছিল।
অনিময়ৰ অভিযোগৰ পিছতে বিভিন্ন দল-সংগঠন আৰু পৰীক্ষাৰ্থীয়ে পৰীক্ষা পুনৰ পতাৰ দাবী তুলিছিল যদিও চৰকাৰে সেয়া নকৰিলে। বৰং চি আই ডিৰ তদন্ত ঘোষণা কৰে। টি আই ডিয়ে ভাৰতীয় দণ্ডবিধিৰ ১২০(বি)/১৬৬/৪০(চি)ৰ অধীনত ৪১৪/২০১৮-অত গোচৰ ৰুজু কৰি তদন্ত কৰে আৰু প্ৰতিবেদনত ১৪ জিলাৰ ৯খনতে অনিয়ম হোৱা বুলি স্পষ্টকৈ উল্লেখ কৰে।
এইবোৰলৈ কাণসাৰ নকৰি চৰকাৰে ৫ মাৰ্চত ফলাফল ঘোষণা কৰি পিছদিনাই, অৰ্থাৎ ৬ মাৰ্চত ততাতৈয়াকৈ নিযুক্তি পত্ৰ বিতৰণ কৰে। কাৰণ ইয়াৰ কেইদিনমান পিছতে নিৰ্বাচনী অধিসূচনা জাৰি কৰাৰ কথা আছিল।
মন্ত্ৰী নৱ দলেৰ বহু সংখ্যক আত্মীয় আৰু উদ্যোগ মন্ত্ৰী চন্দ্ৰ মোহন পাটোৱাৰীৰ কেইবাজনো আত্মীয়ই এই নিযুক্তিত স্থান পোৱাটোক বহু লোকে সন্দেহৰ কাৰণ হিচাপে আঙুলিয়াই দিছিল। লগতে নিযুক্তি প্ৰক্ৰিয়াত বৃহৎ পৰিমাণৰ ধনৰ লেনদেন হোৱা বুলি চাৰিওফালৰ পৰা অভিযোগ আহিছিল।