মৃত্যু ক’ত, কেতিয়া, কিদৰে আহে সেয়া সকলোৰে বাবে অজানা। সুস্থ সবল যেন লগা কোনো এজন লোকৰো হঠাতে মৃত্যু হ’ব পাৰে বা নিৰ্ঘাত মৃত্যু হ’ব বুলি ধৰি লোৱা কোনো মানুহো আশ্চৰ্যজনকভাৱে মৃত্যুমুখৰ পৰা ঘূৰি আহিব পাৰে। গতিকে এজন ব্যক্তিৰ মৃত্যুৰ পূৰ্বানুমান কৰাটো অসম্ভৱ কথা।
যাত্ৰীক নিৰাপদভাৱে কঢ়িয়াই নিয়াৰ দায়িত্বত থকা এখন ৰে’লৰ খোদ চালকজনেই ৰে’ল চলাই থকাৰ অৱস্থাত হৃদৰোগত আক্ৰান্ত হৈ সাবটিবলগীয়া হৈছে মৃত্যুক। উত্তৰ প্ৰদেশত সংঘটিত হৈছে এই মৰ্মান্তিক ঘটনা।
উত্তৰ প্ৰদেশৰ প্ৰতাপগড়-কানপুৰ ইণ্টাৰচিটি এক্সপ্ৰেছৰ মূল ইঞ্জিন চালকজনে শুকুৰবাৰে ৰে’লখন চলাই যোৱা অৱস্থাতে হঠাতে অসুস্থ হৈ মৃত্যুবৰণ কৰে।
গৌৰীগঞ্জ ৰে’ল ষ্টেচনৰ অধীক্ষক প্ৰবীণ সিঙে জানিবলৈ দিয়া মতে পৰশুৰামপুৰ চিলবিলাৰ হৰিশ্চন্দ্ৰ শৰ্মাই নামৰ চালকজনে কানপুৰ অভিমুখে ৰে’লখন চলাই যোৱাৰ মুহূৰ্ততে হঠাতে কাছিমপুৰ হল্টৰ ওচৰত স্বাস্থ্যজনিত সমস্যাৰ সন্মুখীন হয়।
বিমানত থকা সহকাৰী পাইলটজনে লগে লগে ৰে’লখন ৰখাই দিয়ে আৰু চালকজনক চিকিৎসাৰ বাবে নিয়াৰ উদ্দেশ্যে এখন এম্বুলেন্স মাতি দিয়ে।
এম্বুলেন্স খন সেই স্থানত উপস্থিত হোৱাৰ পাছতে ৰে’ল চালক শৰ্মাক ততাতৈয়াকৈ ওচৰৰ স্বাস্থ্য কেন্দ্ৰলৈ লৈ যোৱা হয়। কিন্তু স্বাস্থ্য কেন্দ্ৰটোৰ চিকিৎসকে তেওঁক মৃত বুলি ঘোষণা কৰে।
চিকিৎসকসকলে হৰিশ্চন্দ্ৰ শৰ্মা ৰে’ল খন চলাই যোৱাৰ সময়তে হৃদৰোগত আক্ৰান্ত হৈছিল বুলি সন্দেহ কৰিছে।
আনহাতে শৰ্মাৰ এই অস্বাভাৱিক অসুস্থতাৰ বাবে ৰখাই থোৱা ট্ৰেইনখন পিছত প্ৰতাপগড়ৰ পৰা আন এজন লোকো পাইলটৰ আগমনৰ পিছত পুনৰ যাত্ৰা কৰে।
ইতিমধ্যে নিহত হৰিশ্চন্দ্ৰ শৰ্মাৰ মৃতদেহ মৰণোত্তৰ পৰীক্ষাৰ পিছত পৰিয়ালক গতাই দিয়া হৈছে বুলি ফুৰসাতগঞ্জ আৰক্ষী থানাৰ ভাৰপ্ৰাপ্ত বিষয়া মনোজ কুমাৰ সোনকাৰে জানিবলৈ দিয়ে।
