শিৱসাগৰৰ ১৪ নং বাৰ্ডৰ গোহাঁইচুক আৰু ৭ নং ৱাৰ্ডৰ শান্তিবন আশ্ৰম পথ কনটেইনমেন্ট জ’ন হিচাপে ঘোষণা কৰা হৈছে।
১৪ নং ৱাৰ্ডৰ সূৰ্যলতা গগৈ নামৰ মহিলা গৰাকীৰ দেহত কোভিড ১৯ পজিটিভ পোৱাৰ পিছতে আজি ৭ নং ৱাৰ্ডৰ প্ৰদীপ কাকতি নামৰ আন এজন ব্যক্তিৰ দেহত ধৰা পৰে কোভিড১৯ পজিটিভ।
ভগ্নীৰ চিকিৎসাৰ বাবে গুৱাহাটীলৈ যোৱা ৭ নং ৱাৰ্ডৰ প্ৰদীপ কাকতি নামৰ ব্যক্তিজনে গুৱাহাটীৰ উলুবাৰীত স্বাব টেষ্ট কৰিছিল আৰু শনিবাৰে তেওঁ প্ৰথমে এখন ট্ৰেভেলাত নগাঁৱলৈ আহিছিল।
নগাঁৱৰ পৰা এখন এম্বুলেঞ্চত যোৰহাটলৈ আহিছিল আৰু যোৰহাটৰ পৰা তেওঁক পুত্ৰই এখন গাড়ীৰে শিৱসাগৰলৈ আনিছিল।
আজি গুৱাহাটীৰ পৰা শিৱসাগৰ জিলা উপায়ুক্তক প্ৰদীক কাকতিৰ দেহত কোভিড পজিটিভ পোৱা বুলি ফোনযোগে জনায়।
শিৱসাগৰ জিলা প্ৰশাসনে লগে লগে প্ৰদীপ কাকতিক শিৱসাগৰ অসামৰিক চিকিৎসালয়লৈ প্ৰেৰণ কৰে আৰু ৭ নং ৱাৰ্ড কনটেইমেন্ট জ’ন হিচাপে ঘোষণা কৰে।
আনহাতে শিৱসাগৰ প্ৰশাসনে প্ৰদীপ কাকতিৰ সংস্পৰ্শলৈ অহা সকলো লোকক সোমবাৰৰ ভিতৰত চিনাক্ত কৰি কোৱাৰেন্টাই বা হোম কোৱাৰেন্টাইন কৰিব বুলি জানিবলৈ দিয়ে।
একে দিনাই শিৱসাগৰৰ দুটা অঞ্চল কনটেইনমেন্ট জ’ন হিচাপে ঘোষণা হোৱাত জনসাধাৰণৰ মাজত তীব্ৰ আতংকৰ সৃষ্টি হয়।
জনসাধাৰণক আতংকিত নহবলৈ আহ্বান জনোৱাৰ লগতে যদি কোনো ব্যক্তি প্ৰদীপ কাকতিৰ সংস্পৰ্শলৈ আহিছিল তেওঁক স্বাস্থ্য বিভাগ বা প্ৰশাসনৰ লগত যোগাযোগ কৰিবলৈ অনুৰোধ জনাইছে জিলা প্ৰশাসনে।