জনজাতিকৰণৰ দাবীত আদিবাসী ছাত্ৰ সন্থাৰ মাৰ্ঘেৰিটা আঞ্চলিক সমিতিৰ দ্বাৰা আজি প্ৰায় ১ ঘণ্টাৰ বাবে মাৰ্ঘেৰিটা চেগুনবাৰী তিনিআলিৰ ৩৮ নং ৰাষ্ট্ৰীয় ঘাইপথৰ দুই কাষে ‘মানৱ শৃংখল’এৰে প্ৰতিবাদী কাৰ্যসূচী ৰূপায়ণ কৰে।
প্ৰায় দুই শতাধিক আছাৰ সদস্যই উলিওৱা এই ‘মানৱ শৃঙ্খল’ৰ প্ৰতিবাদী কাৰ্যসূচীৰ সময়ত চৰকাৰ বিৰুদ্ধে সোচাৰ হৈ পৰে। ‘বিজেপি চৰকাৰ হায় হায়, আমাক এছ টি দিবই লাগিব’ আদি বিভিন্ন শ্ল’গানেৰে মাৰ্ঘেৰিটাৰ চেগুনবাৰী তিনিআলিৰ ৰাষ্ট্ৰীয় ঘাইপথত উতাল প্ৰতিবাদ সাব্যস্ত কৰে।
আছাৰ তিনিচুকীয়া জিলা সমিতিৰ নেতা ৰামানুজ লাক্ৰাই কয় যে ভাৰত চৰকাৰে জনজাতিকৰণ দিব বিচাৰিছে কিন্তু অসমৰ টাইবেল সংঘই বাধা প্ৰদান কৰি আহিছে। এইক্ষেত্ৰত টাইবেল সংঘৰ আদিত্য খাকলাৰিক সংযমী হবলৈ আহ্বান জনায়।
আনহাতে আজিৰ প্ৰতিবাদী কাৰ্যসূচীৰ পৰাই আছাই অনতিপ্ৰলমে জনজাতিকৰণ নিদিলে আগন্তক নিৰ্বাচনত বিজেপিৰ বিৰুদ্ধে ভোট বৰ্জন কৰাৰো হুংকাৰ প্ৰদান কৰে।
