কোকৰাঝাৰত সেনা আৰু আৰক্ষীৰ অভিযানত পিষ্টল সহ এজন এন ডি এফ বি (এছ) সদস্য আটক

বিশেষ সূত্ৰৰ পৰা লাভ কৰা তথ্যৰ ভিত্তিত কোকৰাঝাৰ আৰক্ষী আৰু ভাৰতীয় সেনাই ২২ ছেপ্টেম্বৰ আৰু ২৩ ছেপ্টেম্বৰত উগ্ৰপন্থীৰ সন্ধানত ভাৰত-ভূটান সীমান্তত এক যুটীয়া অভিযান চলায়।

অভিযান কালত কোকৰাঝাৰ আৰক্ষী আৰু ভাৰতীয় সেনাই ভাৰত-ভূটান সীমান্তৰ লাওপানী নালা আৰু উল্টাপানী নালাত অভিযান চলাই আৰু উগ্ৰপন্থীৰ সন্দেহজনক চালচলন পৰ্য্যবেক্ষণৰ অনুমান কৰে।

দীৰ্ঘসময়ৰ অভিযানৰ অন্তত ২৩ ছেপ্টেম্বৰত সেনা আৰু আৰক্ষীয়ে দীপক বৰগয়াৰী(২৩) নামৰ এজন এন ডি এফ বি(এছ) সদস্যক আটক কৰিবলৈ সক্ষম হয়।

আটক হোৱা দীপক বৰগয়াৰী চিৰাং জিলাৰ ৰুনিখাটা আৰক্ষী চকীৰ অন্তৰ্গত গৌজনপুৰী গাঁৱৰ তেলকা বৰগয়াৰীৰ পুত্ৰ।

আনহাতে, আটকাধীন উগ্ৰপন্থী সদস্য গৰাকীৰ পৰা এটা ৭.৬৫ এম এম পিষ্টলৰ লগতে ০৫ ৰাউণ্ড সজীৱ গুলী উদ্ধাৰ কৰা হয়।

দীপক বৰগয়াৰী দীৰ্ঘসময় ধৰি অঞ্চলটোত এন ডি এফ বি(এছ)ৰ নতুন সদস্য ভৰ্তিকে ধৰি অন্য সাংগঠনিক কামত জড়িত হৈ আছিল।

আটকাধীন উগ্ৰপন্থী গৰাকীৰ বিৰুদ্ধে এটা গোচৰ ৰুজু কৰা হৈছে।