মঙলবাৰে নিশা লখিমপুৰ আৰক্ষীৰ এটা দলে জিলাখনৰ লালুক অঞ্চলত এক অভিযান চলাই অবৈধভাৱে মজুত কৰি ৰখা নিচাযুক্ত কফ চিৰাপৰ সৈতে এজন লোকক গ্ৰেপ্তাৰ কৰে।
লালুক আৰক্ষী থানাৰ চক্ৰ পৰিদৰ্শক অৰুণ ঘৰফলিয়া আৰু উপ পৰিদৰ্শক অভিলেশ তালুকদাৰৰ নেতৃত্বত যোৱা দলটোৱে লালুকৰ ২ নং কেহুতলিৰ এটা ঘৰত অভিযান চলাই নাওবৈচাৰ দুলাহাট বিষ্ণুপুৰৰ আব্দুল জব্বৰৰ পুত্ৰ আব্দুল হাই (২৭) নামৰ এজন যুৱকক গ্ৰেপ্তাৰ কৰিবলৈ সক্ষম হয়।
আটকাধীন লোকজনৰ পৰা আৰক্ষীয়ে নিষিদ্ধঘোষিত ৬১টা কফ চিৰাপৰ বটল জব্দ কৰে।
উল্লেখ্য যে যোৱা ১৪ ছেপ্তেম্বৰতো লখিমপুৰ আৰক্ষীয়ে মনোজ বৰগোহাঁই নামৰ এজন লোকক ১৫০টা কফ চিৰাফৰ বটলৰ সৈতে গ্ৰেপ্তাৰ কৰিছিল।
ইফালে লখিমপুৰৰ পৰা অৰুণাচল প্ৰদেশলৈ অবৈধভাৱে ১৪টা গৰু সৰবৰাহৰ চেষ্টা চলোৱা দুজন লোককো গ্ৰেপ্তাৰ কৰিবলৈ সক্ষম হয়। গ্ৰেপ্তাৰ হোৱা লোক দুজন হ’ল জিয়াবুৰ আলি আৰু আতিকুল ইছলাম।
