প্ৰধানমন্ত্ৰী নৰেন্দ্ৰ মোডীয়ে পশ্চিম বংগৰ মহিলাসকলক অপমান কৰিছে।
ৰাজ্যখনৰ মুখ্যমন্ত্ৰী মমতা বেনাৰ্জীৰ প্ৰতি প্ৰধানমন্ত্ৰী মোডীয়ে বিজেপিৰ নিৰ্বাচনী সভাসমূহত উপহাসমূলক মন্তব্য কৰাৰ বাবে তৃণমূল কংগ্ৰেছে এইদৰে কয়।
দেওবাৰে এখন সংবাদমেল সম্বোধন কৰি তৃণমূল নেতা তথা মন্ত্ৰী শশী পাঞ্জাই কয় যে দেশখনৰ প্ৰধানমন্ত্ৰী আৰু গৃহমন্ত্ৰীয়ে নিজৰ পদবীৰ প্ৰতি সন্মান প্ৰদৰ্শন কৰা নাই।
তেওঁ কয় যে প্ৰধানমন্ত্ৰীয়ে ব্যংগাত্মক সুৰত কথা কৈ মহিলাৰ প্ৰতি থকা তেওঁৰ ঘৃণাক প্ৰতিফলিত কৰিছে।
তৃণমূল নেতাগৰাকীয়ে ইয়াক দূৰ্ভাগ্যজনক আখ্যা দিয়ে।
মমতা বেনাৰ্জীক উপহাসস্বৰূপে মোদীয়ে শেহতীয়াকৈ ”দিদী অ’ দিদী” বুলি সম্বোধন কৰাক লৈ তৃণমূল নেতাগৰাকীয়ে কয়- ”এগৰাকী প্ৰধানমন্ত্ৰীয়ে এগৰাকী মুখ্যমন্ত্ৰীৰ সম্পৰ্কত ৰাজহুৱাকৈ এইদৰে ক’ব পাৰেনে?”
ইয়াৰ বাবে প্ৰধানমন্ত্ৰীজন নিম্ন মানদণ্ডলৈ অৱনমিত হোৱা বুলি কৈ তৃণমূল নেতাগৰাকীয়ে কয় যে এইসমূহে তেওঁক এজন ‘নাৰী উৎপীড়ক’ হিচাপে গণ্য কৰিব লগা পৰিস্থিতিৰ সৃষ্টি হৈছে।
তৃণমূল নেতা শশী পাঞ্জাৰ বক্তব্যক সমৰ্থন কৰি সংবাদমেলখনত উপস্থিত থকা মহিলা নেত্ৰী জুন মালিয়াই কয় যে এয়া কেৱল মমতা বেনাৰ্জীৰ প্ৰতিয়েই উপহাস নহয়, বংগৰ সমূহ নাৰীৰ প্ৰতিয়ে অপমানজনক।
”নাৰীত্বৰ প্ৰতি ই এক অপমান।”- মালিয়াই কয়।
মালিয়াই কয় যে যোৱা ২৫ বছৰধৰি সাংসদ আৰু মন্ত্ৰীত্বৰ দায়িত্ব পালন কৰি অহা মমতা বেনাৰ্জীক এইদৰে কোনো প্ৰধানমন্ত্ৰীয়ে পূৰ্বে অপমান কৰা নাছিল।
”ই প্ৰমাণ কৰে যে বিজেপিয়ে কিমান তলৰ পৰ্যায়লৈ নামিব পাৰে।”- তেওঁ কয়।
সংবাদমেলখনত উপস্থিত থকা আন এগৰাকী তৃণমূলৰ মহিলা নেত্ৰী অনন্যা চক্ৰৱৰ্তীয়ে কয়. যে ইমানখিনি অপমানৰ পাছতো বংগৰ জনতাই শেষ হাঁহি মাৰিব।
তেওঁ গুজৰাট চৰকাৰৰ কেতবোৰ তথ্য দাঙি ধৰি কয় যে যোৱা দুবছৰত গুজৰাটত দৈনিক দুটাকৈ হত্যাকাণ্ড, চাৰিটা ধৰ্ষণকাণ্ড আৰু ছটা অপহৰণৰ ঘটনা সংঘটিত হৈ আহিছে।
তেওঁ কয় যে গুজৰাটৰ আটাইতকৈ বৃহৎ চহৰ আহমেদাবাদ এখন ধৰ্ষণৰ ৰাজধানী হিচাপে পৰিগণিত হৈছে।
”আমি বংগক আন এখন গুজৰাট হ’বলৈ দিব নোৱাৰো।”- চক্ৰৱৰ্তীয়ে কয়।
উল্লেখযোগ্য যে শেহতীয়াকৈ নৰেন্দ্ৰ মোডীয়ে নিৰ্বাচনী ভাষণসমূহত মমতা বেনাৰ্জীৰ প্ৰতি বিভিন্ন উপহাস-ব্যংগাত্মক মন্তব্য প্ৰদান কৰি আহিছে।
