পৰেশ বৰুৱাক আলোচনালৈ চৰকাৰে আহ্বান জনাই থকাৰ সময়তে উজনি অসমত আলফা (স্বা:) পুনৰ অপহৰণ কাণ্ড সংঘটিত কৰিছে।
১১ ফেব্ৰুৱাৰিত সংগঠনটোৰ এটা ৮-১০জনীয়া অস্ত্ৰধাৰী দলে তিনিচুকীয়া জিলাৰ মাৰ্ঘেৰিটা মহকুমাৰ জাগুনৰ শিলৰ ব্যৱসায়ী ৰাজু খানৰ শিলৰ ক্ৰাছাৰ মিলৰ মহৰী বৈকুণ্ঠ সন্দিকৈ নামৰ এজন ব্যক্তিক অপহৰণ কৰে বুলি জানিব পৰা গৈছে৷
দুপৰীয়া প্ৰায় ১২ বজাত সংঘটিত ঘটনাটোৰ সময়ত বৈকুণ্ঠ সন্দিকৈয়ে অসম-অৰুণাচল সীমান্ত ১নং ৱাৰাৰ টিৰাপ নৈত কাম কৰি আছিল।
এটা সূত্ৰৰ দাবী, আলফা( স্বা:)ৰ দুৰ্ধষ কেডাৰ উদয় অসমৰ নেতৃত্বত এই অপহৰণ কাণ্ড সংঘটিত কৰিছে
একেটা সূত্ৰই জানিবলৈ দিয়া অনুসৰি কিছুদিন পূৰ্বে আলফা (স্বা:)ৰ তৰফৰ পৰা বহু বিৰ্তকিত শিল ব্যৱসায়ী ৰাজু খানক ধন দাবী পত্ৰ প্ৰদান কৰিছিল কিন্তু ৰাজু খানে আলফা দাবী কৰা ধন দিয়া নাছিল।
উল্লেখ যে জাগুন অঞ্চলৰ শিল ব্যৱসায়ীৰ পুত্ৰ- কৰ্মচাৰীক বিগত কিছু বছৰ ধৰি আলফা (স্বা:) অপহৰণ কৰি ধন দাবী কৰি আহিছে৷
আজিৰ অপহৰণ কাণ্ডৰ খবৰ পোৱা মাত্ৰকে লেখাপানী, জাগুন আৰক্ষীৰ লগতে সেনাই উদ্ধাৰ অভিযান আৰম্ভ কৰিছে যদিও বৰ্তমানলৈকে বৈকুণ্ঠ সন্দিকৈৰ শুংসূত্ৰ উলিয়াব পৰা নাই৷
আনহাতে অপহৰণ কাণ্ডৰ খবৰ বিয়পি পৰাত সমগ্ৰ তিনিচুকীয়া জিলাতে চাঞ্চল্য বিৰাজ কৰিছে৷
অপহৃত বৈকুণ্ঠৰ ঘৰ জাগুনৰ ১০ মাইল পাৰ্বতীপুৰত বুলি জানিব পৰা গৈছে৷ যুৱকজনে মাত্ৰ ১ বছৰ পূৰ্বে বিয়া কৰাইছিল আৰু পৰিয়ালে যথেষ্ট চিন্তিত হৈ পৰিছে৷
যিয়েই এই অপহাৰণ কাণ্ড সংঘটিত কৰিছে অনতিপলমে তেওঁক এৰি দিবলৈ সংবাদ মাধ্যম যোগে কাতৰ অনুৰোধ কৰিছে পৰিয়ালৰ লোকে৷