‘এজন বিধায়ক, এক পেঞ্চন’ আঁচনিত অনুমোদন জনালে পঞ্জাৱৰ চৰকাৰে।পঞ্জাৱৰ ভগৱন্ত মান নেতৃত্বাধীন চৰকাৰে শনিবাৰে এই কথা প্ৰকাশ কৰে। পঞ্জাৱৰ ৰাজ্যপালে এই বিষয়ক বিধেয়কত সন্মতি দিয়াৰ পিছতে প্ৰাক্তন বিধায়কসকলক কেৱল এটা কাৰ্যকালৰ বাবে পেঞ্চন প্ৰদান কৰা হ’ব। এই সম্পৰ্কীয় এক জাননী আজি জাৰি কৰা হৈছে।
ৰাজ্যপাল বনৱাৰীলাল পুৰোহিতে ‘এজন বিধায়ক, এক পেঞ্চন’ আঁচনিত অনুমোদন জনাইছে বুলি ঘোষণা কৰাৰ নগতে পঞ্জাৱৰ মুখ্যমন্ত্ৰী ভগৱন্ত মানে কয় যে আপ চৰকাৰে এই আঁচনি গ্ৰহণ কৰাৰ ফলত কেইবা কোটি টকা ৰাহি কৰিব পৰা যাব। মুখ্যমন্ত্ৰী ভগৱন্ত মানে টুইটযোগে কয়, “ৰাজ্যপালে এজন বিধায়ক-এক পেঞ্চন বিধেয়কত সন্মতি প্ৰদান কৰিছে।
এই কথা জনাবলৈ পাই মই অত্যন্ত আনন্দিত। চৰকাৰে এই বিষয়ত এখন জাননী জাৰি কৰিছে।” পঞ্জাৱ বিধানসভাই ৩০ জুনত পঞ্জাৱ বিধানসভাৰ সদস্য (পেঞ্চন আৰু চিকিৎসা সুবিধা নিয়ন্ত্ৰণ) সংশোধনী বিধেয়ক, ২০২২ গৃহীত কৰিছিল। এই আইন অনুসৰি, এজন বিধায়কক কেৱল তেওঁৰ এটা ম্যাদ অনুসৰি পেঞ্চন দিয়া হ’ব।
ফলত নেতাজনে কিমান বাৰ বিধায়ক নিৰ্বাচনত প্ৰতিদ্বন্দিতা কৰি বিজয়ী হৈছে সেয়া গুৰুত্বপূৰ্ণ নহ’ব। ৰাজ্য চৰকাৰে এই পদক্ষেপৰ জৰিয়তে বছৰি প্ৰায় ১৯.৫৩ কোটি টকা ৰাহি কৰিব পাৰিব বুলি আশা কৰা হৈছে। উল্লেখ্য ফেব্ৰুৱাৰী-মাৰ্চ মাহত পঞ্জাৱ আম আদমী পাৰ্টিয়ে চৰকাৰ গঠন কৰাৰ পিছতে ঘোষণা কৰিছিল যে আপৰ চৰকাৰে ভিআইপি সংস্কৃতি বিকশিত হ’বলৈ নিদিয়ে।