যোৰহাট জিলাৰ টীয়ক বিদ্যুৎ উপ-সংমণ্ডল বিভাগৰ দায়িত্বজ্ঞানহীনতাৰ ফলত কালি দুৰ্ভাগ্যজনক ভাৱে বিদুৎ পৰিবাহী তাঁৰ ছিঙি বিদুৎস্পৃষ্ট হৈ প্ৰাণ হেৰুৱাই টীয়ক পৰ্বতীয়া গাঁৱৰ বিষ্ণু বৰা নামৰ এজন লোকে।
কালি ঘটনাটো সংঘটিত হোৱাৰ পিছতে ঘটনাস্থলীত উপস্থিত হৈ বিদ্যুৎ বিভাগৰ উচ্চপদস্থ বিষয়াক ৰাইজ তথা টীয়ক আঞ্চলিক ছাত্ৰ সন্থাই তাৎক্ষণিকভাৱে ক্ষতিপূৰণ দিবলৈ দাবী জনাইছিল।
আজি টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞা আৰু সাধাৰণ সম্পাদক প্ৰীতমজ্যোতি শইকীয়াৰ লগতে বিশ্বজিৎ নাথ, যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগ, টীয়ক জাতীয় বিদ্যালয়ৰ সচিব সৌৰভ বৰা, টীয়ক শাখা কবি সন্মিলনৰ সম্পাদক বিমান শইকীয়া, ৰেঙণি এটি আশাৰ সঞ্চালক বিজু কুমাৰ শৰ্মা, যুৱ ছাত্ৰ পৰিষদৰ টীয়ক আঞ্চলিক সমিতিৰ সভাপতি হিমাংশু বৰুৱাৰ স্বাক্ষৰিত এখনি স্মাৰকপত্ৰ টীয়ক বৈদ্যুতিক উপ সংমণ্ডল বিষয়া ভাস্কৰজ্যোতি গগৈক সাক্ষাৎ অপৰ্ণ কৰে।
সংগঠনকেইটাই ঘটনাটোৰ উচ্চপৰ্যায়ৰ তদন্তৰ লগতে ক্ষতিপূৰণ হিচাপে ৫ লাখ টকা তৎকালীনভাৱে দিয়াৰ ব্যৱস্থা কৰা দাবী জনাইছে।
ইয়াৰ লগতে স্মাৰক পত্ৰৰ যোগে আওপুৰণি বৈদ্যুতিক তাঁৰৰ লগতে অন্যান্য সা- সৰঞ্জাম আধুনিকীকৰণ কৰিবলৈ দাবী জনাইছে।
স্মাৰকপত্ৰখনি যোৰহাট জিলা উপায়ুক্ত, অসমৰ শক্তি মন্ত্ৰী, অসম শক্তি বিতৰণ লিমিটেডৰ মুখ্য কাৰ্যবাহী বিষয়ালৈ প্ৰেৰণ কৰিছে।
উল্লেখ্য যে, সাক্ষাৎৰ সময়ত উপ সংমণ্ডল বিষয়াজনে ক্ষতিপূৰণৰ ব্যৱস্থা কৰিব বুলি আশ্বাস দিয়ে।
