চৰাইদেউত ২৩ জুনত দুপৰীয়া সাপেখাতী আৰক্ষীয়ে অভিযান চলাই এগৰাকী আলফা স্বাধীনৰ কেডাৰক গ্ৰেপ্তাৰ কৰিবলৈ সক্ষম হয়। আৰক্ষীৰ হাতত গ্ৰেপ্তাৰ হোৱা আলফা স্বাধীনৰ সদস্যগৰাকীৰ নাম ৰিতুপৰ্ণ অসম ওৰফে সুৰজিত লিম্বু (১৭-১৮)।
সুৰজিত লিম্বু চৰাইদেউ জিলাৰ সাপেখাতী আৰক্ষী থানাৰ অন্তৰ্গত ধুনীয়া পথাৰৰ ফিস্থা লিম্বুৰ পুত্ৰ।
অষ্টম শ্ৰেণীলৈ পঢ়া লিম্বু ২০১৮ চনৰ ৬ চেপ্তেম্বৰৰ পৰা ঘৰৰ পৰা সন্ধানহীন হৈ আছিল। পাছত তেওঁ নিষিদ্ধ ঘোষিত উগ্ৰপন্থী সংগঠন আলফা স্বাধীনত যোগদান কৰা বুলি নিশ্চিত হৈছিল পৰিয়ালৰ লোক।
উল্লেখযোগ্য যে, একেদিনাই তিনিচুকীয়া জিলাৰ বৰডুমচা আৰক্ষী থানাৰ অন্তৰ্গত মিহলি ৰিতুৰ অঞ্চলৰ পৰা সেনা আৰু আৰক্ষী যুটীয়া অভিযান চলাই জাউৰিপ চিংফৌ নামৰ এগৰাকী আলফা স্বাধীনৰ লিংকমেনক অস্ত্ৰ-শস্ত্ৰ সহ আটক কৰিছিল।
একেদিনাই দুজনকৈ আলফা স্বাধীনৰ সদস্য এনেদৰে আৰক্ষীৰ হাতত গ্ৰেপ্তাৰ হ’বলগীয়া হোৱাটো আলফা স্বাধীনৰ ওপৰত এক মোক্ষম আঘাত।
ম্যানমাৰ সেনাই ভাৰত-ম্যানমাৰ সীমান্তত থকা উগ্ৰপন্থী সংগঠনসমূহৰ ঘাটিত চলোৱা অভিযানৰ পাছত ভালেকেইগৰাকী আলফা স্বাধীনৰ সদস্যই সেনা আৰু আৰক্ষীৰ হাতত গ্ৰেপ্তাৰ হৈছে অথবা আত্মসমৰ্পন কৰিবলৈ বাধ্য হৈছে।
