ননিৰ ভয়াৱহ ভূমিস্খলনৰ আতং মাৰ নাযাওঁতেই শুকুৰবাৰে পুনৰ মণিপুৰত সংঘটিত হৈছে আন এক ভূমিস্খলন। ৰাজ্যখনৰ চুৰাচান্দপুৰ জিলাত হোৱা ভূমিস্খলনত এগৰাকী মহিলাসহ দুজন লোক নিহত হোৱাৰ উপৰিও ১০ জন লোক আহত হয়।
চুৰাচান্দপুৰৰ এজন জিলা বিষয়াই জনোৱা অনুসৰি ভূমিস্খলনৰ ফলত ১২ জন লোকক কঢ়িয়াই নিয়া এখন যাত্ৰীবাহী বাহনত থকা এগৰাকী ৪৯ বছৰীয়া মহিলাৰ থিতাতে মৃত্যু হয় আৰু আন ১০ জন গুৰুতৰভাৱে আহত হয়।
আহতসকলৰ ভিতৰত পাঁচগৰাকী মহিলা আছিল বুলি বিষয়াগৰাকীয়ে জানিবলৈ দিয়ে। আহতসকলক তাৎক্ষণিকভাৱে চিকিৎসালয়লৈ প্ৰেৰণ কৰা হয় যদিও চিকিৎসাধীন অৱস্থাতে আন এগৰাকী লোকৰ মৃত্যু হয় বুলি তেওঁ লগতে উল্লেখ কৰে।
জিলা কাৰ্যালয়ৰ পৰা প্ৰায় ৮০ কিলোমিটাৰ দূৰত অৱস্থিত ছাণ্টিং আৰু চাইহুয়ান গাঁৱৰ মাজত ১৫০ নং ৰাষ্ট্ৰীয় ঘাইপথৰ টিপাইমুখ পথৰ ওচৰত এই দুৰ্ঘটনাটো সংঘটিত হৈছিল।
ইফালে শুকুৰবাৰে পুনৰ এটা মৃতদেহ উদ্ধাৰ হোৱাৰ পিছত ননি ভূমিস্খলনত মৃত্যুৰ সংখ্যা ৪৯ লৈ বৃদ্ধি পাইছে।ননি জিলাৰ বিষয়াসকলে জনোৱা অনুসৰি ৩০ জুনত হোৱা বিধ্বংসী টুপুল ভূমিস্খলনৰ পিছত টেৰিটৰিয়েল আৰ্মীৰ জোৱানসহ ১২ জন লোকএতিয়াও হিচাপ বিহীন হৈ আছে।
টেৰিটৰিয়েল আৰ্মীৰ ৩২ জন সৈনিকৰ লগতে স্থানীয় লোক আৰু ৰেলপথকৰ্মীসহ ৪৯ টা মৃতদেহ বৰ্তমানলৈকে উদ্ধাৰ কৰা হৈছে। প্ৰতিকূল বতৰকো নেওচি নিখোজ লোকসকলৰ সন্ধানৰ বাবে অভিযান অব্যাহত আছে।
ইয়াৰ উপৰিও স্থানীয় বিষয়াসকলৰ মতে, টুপুল আৰু ননি জিলা সদৰৰ মাজত যোৱা চাৰি দিনধৰি ৩৭ নং ৰাষ্ট্ৰীয় ঘাইপথত শিল পৰি থকাৰ ফলত ৰাজপথেৰে ভ্ৰমণ কৰা লোকসকলৰ জীৱন বিপদাপন্ন হৈছে।
এজন জিলা বিষয়াই জনোৱা অনুসৰি জৰুৰীকালীন সামগ্ৰী পৰিবহন কৰা সকলক বাদ দি টুপুল আৰু নামদুয়াঞ্জং গাওঁসমূহৰ মাজৰ ৩৭ নং ৰাষ্ট্ৰীয় ঘাইপথ সকলো বাহনৰ চলাচল উপায়ুক্তই বন্ধ কৰি দিছে।
