২৪৩ টাৰ ভিতৰত মাত্ৰ ১০ টা। অংকৰ হিচাপত চাৰি শতাংশতকৈ অলপ বেছি! শুকুৰবাৰে প্ৰকাশ পোৱা বিহাৰ বিধানসভা নিৰ্বাচনৰ ফলাফলত দেখা গৈছে যে শাসকীয় দল আৰু বিৰোধী দলকে ধৰি ২৪৩ জন বিধায়কৰ ভিতৰত মাত্ৰ ১০ জন সংখ্যালঘু মুছলমান বিধায়কহে নিৰ্বাচিত হৈছে।
বিহাৰৰ নিৰ্বাচনৰ ইতিহাসত দেখা গৈছে যে ১৯৯০ চনৰ পৰা আৰম্ভ কৰি ৮ টা বিধানসভা নিৰ্বাচনৰ ভিতৰত এইবাৰ সৰ্বনিম্ন সংখ্যক মুছলমান প্ৰতিনিধি বিধানসভালৈ নিৰ্বাচিত হৈছে।
বিহাৰ বিধানসভা নিৰ্বাচনৰ ফলাফলৰ সম্পূৰ্ণ তথ্য এতিয়াও ভোট বিশ্লেষকসকলৰ হাতলৈ অহা নাই। ফলত শনিবাৰলৈকে কোনে সৰ্বাধিক সংখ্যালঘু ভোট লাভ কৰে সেয়া সম্পূৰ্ণ স্পষ্ট হোৱা নাছিল। অৱশ্যে এটা কথা স্পষ্ট যে এইবাৰ বিধানসভাত সংখ্যালঘু প্ৰতিনিধিত্ব বহু নামি আহিছে।
২০২২-২৩ বৰ্ষৰ বিহাৰৰ জাতিভিত্তিক সমীক্ষাত প্ৰকাশ পোৱা তথ্য অনুসৰি সেই ৰাজ্যৰ মুঠ ১৩.০৭ কোটি জনসংখ্যাৰ ১৭.৭ শতাংশই মুছলমান। কিন্তু এন ডি এ আৰু মহাজোঁটবন্ধন দুয়োটা দলে ২০২০ চনৰ তুলনাত এইবাৰ কম সংখ্যক মুছলমান প্ৰতিনিধিক নিৰ্বাচনত অৱতীৰ্ণ হোৱাৰ সুযোগ দিছে।
ফলাফল অনুসৰি এইবাৰ জয়ী হোৱা ১০ জন সংখ্যালঘু প্ৰাৰ্থীৰ ভিতৰত ৫ জন আছাদুদ্দিন ওৱাইছিৰ এ আই এম আই এমৰ। এইবাৰ তেওঁলোকে ২৫ জন প্ৰাৰ্থীক প্ৰক্ষেপ কৰিছিল।
নীতিশ কুমাৰৰ জেডিইউ দলে এইবাৰ চাৰিজন সংখ্যালঘু প্ৰাৰ্থী প্ৰক্ষেপ কৰে। ইয়াৰে বিদায়ী কেবিনেট সদস্য মহম্মদ জামা খানে কেৱল চাইনপুৰ সমষ্টিৰ পৰাই জয়লাভ কৰে। ২০২০ চনত বিএছপিৰ টিকটত জয়ী হৈছিল যদিও পিছত জেডিইউত যোগদান কৰে। অৱশ্যে এই সমষ্টি সংখ্যালঘু প্ৰধান নহয় বুলি সমীক্ষা বিশ্লেষকসকলে কয়।
এন ডি এৰ আন এক মিত্ৰজোঁটৰ অংশীদাৰ চিৰাগ পাছৱানৰ এল জে পি (আৰ ভি) দলে বাহাদুৰগঞ্জ সমষ্টিৰ পৰা একমাত্ৰ সংখ্যালঘু মুখ মহম্মদ কালিমুদ্দিনক প্ৰক্ষেপ কৰিছিল যদিও তেওঁ জয়ী হ’ব নোৱাৰিলে। এই আসনত জয়লাভ কৰে এ আই এম আই এমৰ প্ৰাৰ্থীয়ে।
মহাজোঁটবন্ধনৰ সদস্যসকলৰ ভিতৰত তেজস্বী যাদৱৰ আৰজেডিৰ দুই সংখ্যালঘু মুখ, বিছফী আসনৰ পৰা আছিফ আহমেদ আৰু ৰঘুনাথপুৰৰ বাহুবলী চাহাবুদ্দিনৰ পুত্ৰ ওছামা চাহেবে জয়লাভ কৰে। ২১ বছৰ পূৰ্বে শ্বাহাবুদ্দিনৰ পৰিয়ালৰ এজন সদস্যই নিৰ্বাচনত জয়লাভ কৰিছিল।
আনহাতে, কংগ্ৰেছ দলৰ কিছানগঞ্জৰ পৰা মহম্মদ কামৰুল হুদা আৰু আৰিয়াৰ পৰা আবিদুৰ ৰহমান জয়ী হৈছে। যোৱাবাৰো সীমাঞ্চল অঞ্চলৰ এই দুখন আসনৰ পৰা কংগ্ৰেছৰ সংখ্যালঘু প্ৰাৰ্থীয়ে জয়লাভ কৰিছিল।
পৰিসংখ্যা অনুসৰি ২০১০ চনত ১৯ জন সংখ্যালঘু বিধায়ক জয়ী হৈছিল, যিটো মুঠ বিধায়কৰ ৭.৮১ শতাংশ। সেইবাৰ জেডিইউৰ ৭, আৰজেডিৰ ৬, কংগ্ৰেছৰ ৩, এলজেপিৰ ২ আৰু বিজেপিৰ এজন জয়ী হৈছিল।
২০১৫ চনত মুছলমান বিধায়কৰ সংখ্যা ২৪ অৰ্থাৎ ৯.৮৭ শতাংশলৈ বৃদ্ধি পাইছিল। ২০২০ চনত এই সংখ্যা পুনৰ ১৯ লৈ হ্ৰাস পাইছিল।
