২০২২ চনৰ নৱেম্বৰ মাহত চেটজিপিটিয়ে আত্মপ্ৰকাশ কৰে।অপেনএআইয়ে নিৰ্মাণ কৰা এই চেটবটে আৰম্ভণিৰে পৰাই সকলোকে আচৰিত কৰি তুলিছিল। ই সোনকালে সকলোৰে হৃদয় জয় কৰিছিল। এতিয়া ছেম অল্টমেনৰ কোম্পানীয়ে এআই ভিত্তিক ভিডিঅ’ তৈয়াৰ কৰাৰ সুযোগ প্ৰদান কৰিবলৈ নতুন ছ’চিয়েল ভিডিঅ’ এপ ‘ছ’ৰা’ মুকলি কৰিছে। কিন্তু এতিয়াৰ বাবে আমেৰিকা আৰু কানাডাৰ আইফোন ব্যৱহাৰকাৰীয়েহে ইয়াক ব্যৱহাৰ কৰিব পাৰিব। তদুপৰি এণ্ড্ৰইডত কেতিয়া লঞ্চ হ’ব সেয়াও জানিব পৰা হোৱা নাই।
এই এপটো ঠিক কেনেকুৱা?
এই এপটোৰ পৰা চুটি ভিডিঅ’ তৈয়াৰ কৰিব পাৰি, ঠিক টিকটক বা ইনষ্টাগ্ৰামৰ ৰিলৰ দৰে। কিন্তু বিশেষত্ব হ’ল ইয়াত এআই বা কৃত্ৰিম বুদ্ধিমত্তাৰ ব্যৱহাৰ কৰা হ’ব। এই এপটোৰ মূল আকৰ্ষণ হ’ব ‘কেমিঅ’’ নামৰ এটা বৈশিষ্ট্য। ব্যৱহাৰকাৰীয়ে AI ব্যৱহাৰ কৰি চুটি ভিডিঅ’ তৈয়াৰ কৰিব পাৰে। যদি আন ব্যৱহাৰকাৰীয়ে বিচাৰে তেন্তে সেই ভিডিঅ’টো ব্যৱহাৰ কৰি নিজেই নতুন ক্লিপ তৈয়াৰ কৰিব পাৰে। তেওঁলোকে Sora 2 মডেল ব্যৱহাৰ কৰিব পাৰে।
কেমিঅ’ নামৰ এই বৈশিষ্ট্য ব্যৱহাৰ কৰি কেৱল বন্ধুৱেই নহয়, অনুমতি থকা আন যিকোনো ব্যক্তিকো ভিডিঅ’টোত যোগ কৰিব পাৰিব। অৱশ্যে সেই ক্ষেত্ৰত যিজনৰ মুখখন ব্যৱহাৰ কৰা হয় সেইজনো ভিডিঅ’টোৰ ‘সহ-মালিক’ হৈ পৰিব। তেওঁ ভিডিঅ’টোৰ ‘এক্সেছ’ নিয়ন্ত্ৰণ কৰিবলৈ সক্ষম হ’ব। আনকি তেওঁ ভিডিঅ’টো ডিলিট কৰিব পাৰে।
ইয়াৰ উপৰিও ‘ৰিমিক্স’ নামৰ আন এটা বৈশিষ্ট্যও আছে। ইয়াৰ সহায়ত ব্যৱহাৰকাৰীয়ে যিকোনো ক্লিপ ট্ৰেণ্ডত নিজকে বিলীন কৰিব পাৰে। অৱশ্যে ভিডিঅ’বোৰৰ দৈৰ্ঘ্য ১০ ছেকেণ্ডতকৈ বেছি নহ’ব।
স্বাভাৱিকতে ভিডিঅ’বোৰৰ নিৰাপত্তাক লৈ প্ৰশ্ন উত্থাপন হয়। সেই কথা মনত ৰাখি OpenAI এ এনে নিয়ম কৰিছে যে অশ্লীল বা প্ৰতিশোধমূলক ভিডিঅ’ বনাব নোৱাৰি।
ইয়াৰ উপৰিও চেলিব্ৰিটিৰ মুখৰ ব্যৱহাৰৰ অনুমতি নাই। কিন্তু কোনো জনপ্ৰিয় ব্যক্তিয়ে যদি নিজৰ ‘কেমিঅ’’ আপলোড কৰি ব্যৱহাৰ কৰিবলৈ সন্মত হয়, তেন্তে সেয়া বেলেগ কথা। এতিয়াৰ বাবে কোম্পানীটোৰ কাৰ্যবাহীসকল এই নতুন এপটোক লৈ উৎসাহিত হৈ পৰিছে।
